राजविराज । नेपाल पत्रकार महासंघ, सप्तरीले एक हप्ते आन्दोलन घोषणा गरेको छ ।
जिल्ला प्रशासन कार्यालय सप्तरीले पत्रकारलाई फोटो–भिडियो खिच्न रोक लगाउँदै संविधान विपरित प्रेस स्वतन्त्रतामाथि हस्तक्षेप हुने गरी जारी गरेको उर्दी र पछिल्लो केही दिनयता सप्तरीमा प्रहरीद्वारा पत्रकारमाथि भएको कुटपिट तथा प्रशासन कार्यालयमा भएको दुब्र्यवहार विषयलाई लिएर एक हप्ते आन्दोलन घोषणा गरिएको छ ।
जिल्ला प्रशासन कार्यालय सप्तरीले क्षमायाचनासहितको उर्दी फिर्ता लिई पूर्ण प्रेस स्वतन्त्रताको वातावरण बनाउनुपर्ने र जिल्ला प्रहरी कार्यालय सप्तरीमा पत्रकार मनोहर पोखरेलमाथि आक्रमण भएको घटनामा संलग्न असईमाथि कानून बमोजिम कार्वाही गरिनुपर्ने दुई सूत्रीय माग राखेर आन्दोलन घोषणा गरिएको महासंघले शुक्रबार बिज्ञप्ती जारी गर्दै बताएको छ ।
आन्दोलन अनुसार शनिवार (आज) मौन जुलुस प्रदर्शन गर्ने, आईतवार मैनबत्ती जुलुस प्रदर्शन गर्ने, सोमबार सिटी जुलुस प्रदर्शन गर्ने, मंगलवार १ घण्टा प्रशासनमा धर्ना दिने, बुधवार २ घण्टा, बिहीवार ३ घण्टा धर्ना दिने, शुक्रवार जिल्ला प्रशासन कार्यालयमा २४ घण्टे रिले अनसन गरिने बिज्ञप्तीमा जनाइएको छ ।
‘पत्रकार महासंघ वार्ता–सम्वादको विरोधमा नरहेको जानकारी गराउँदै पछिल्लो पटक एकातर्फ वार्ताका लागि प्रशासन कार्यालयले बोलाउने र अर्कोतर्फ एक पत्रिकाको अन्तर्वार्तामा प्रमुख जिल्ला अधिकारीले पत्रकारलाई नियन्त्रण गर्न खोजेको भनि अभिब्यक्ति दिने काम स्वतः वार्ता विरोधी भएको स्पष्ट छ’ बिज्ञप्तीमा भनिएको छ, ‘संविधान विपरित कार्य गर्ने प्रशासन कार्यालयलाई क्षमायाचनासहितको उक्त उर्दी फिर्ता गर्न पत्रकार महासंघ शाखा सप्तरीले आग्रह गर्दा पनि त्यसको वेवास्ता गरिएको हाम्रो ठहर छ ।’
संघर्ष र सम्वादसँगै लगिने भएकाले मध्यस्थकर्ताको जिम्मेवारी कार्यसमिति सदस्य विद्यानन्द राम र कृष्णकुमार मण्डललाई दिएको विज्ञप्तीमा उल्लेख गरिएको छ ।
