राजविराज । जन्ती जाँदै गरेका दुई जना नेपाली युवकको भारतमा दुर्घटनामा परी ज्यान गएको छ ।
सप्तरीको छिन्नमस्ता गाउँपालिका वडा नम्बर ३ बाट भारतको बिहार राज्य अन्तर्गत मधुवनी जिल्लाको लौकही बथनाहातर्फ जन्ती जाँदै गरेको अवस्थामा उनीहरु सबार गाडी सोमबार राति दुर्घटनामा परेको हो ।
दुर्घटनामा परी छिन्नमस्ता ३ का २२ बर्षीय गोबिन्द सदा र १४ बर्षीय नितेश सदाको मृत्यु भएको छ ।
डिजे लोड भएको गाडीमा एक दर्जनभन्दा बढी युवा बसेका थिए । उक्त गाडी बथनाहा नजिकैको सडक छेउमा एक विद्युतिय पोलमा ठोक्किएर दुर्घटना हुँदा यी दुई युवकसहित एक भारतीयको पनि मृत्यु भएको छ । डिजेका अपरेटरको रुपमा कार्यरत गाडीमा सबार ती भारतीयको मृत्यु भएको हो ।
दुर्घटनामा आधा दर्जन व्यक्ति घाइते भएका छन् । यसमध्ये चार जना नेपाली छन् । उनीहरुको भारतकै अस्पतालमा उपचार भइरहेको छिन्नमस्ता गाउँपालिकाका राजनीतिज्ञ जयप्रकाश यादवले जानकारी दिए ।
छिन्नमस्ता गाउँपालिका ३ का सुमन सदाको विवाहका लागि यहाँबाट भारततर्फ जन्ती गइरहेको थियो । मृतक नितेश भने बेहुला सुमनका फूफूका छोरा हुन् ।
मृतकमध्ये एक जनाको शव ल्याइसकिएको र अरुको ल्याउने प्रयास भइरहेको यादवले जानकारी दिए ।
एकै गाउँका दुई जनाको दुर्घटनामा परी मृत्यु भएपछि गाउँ नै शोकमग्न भएको राजनीतिज्ञ यादवले बताए । ‘घट्ना भएको सूचना आएदेखि नै गाउँमा रुवाबासी चलेको छ’ उनले भने, ‘दुर्घटनाको प्रमुख कारण डिजे पनि हो । अत्यधिक साउण्ड दिएर चलाएपछि गाडी दुर्घटना भएको जानकारीमा आएको छ ।’
