राजविराज । संघीय सडक सुपरीवेक्षण तथा अनुगमन कार्यालय, दमकका प्रमुख विनोद मौवारले आगामी असारभित्र रुपनी–छिन्नमस्ता सडकको काम सम्पन्न गर्ने प्रतिबद्धता जनाएका छन् ।
निर्माणाधीन यो सडकको काम सुस्त गतिमा भइरहेको पाइएपछि छिन्नमस्ता गाउँपालिकाका अध्यक्ष विद्यानन्द चौधरीले मौवारसहित सडक डिभिजन कार्यालय लहानका कर्मचारी, निर्माणा व्यवसायीसँग छलफल गरेका छन् ।
छलफलाका क्रममा झापादेखि कमलासम्मको भाग हेर्ने संघीय सडक सुपरीवेक्षण तथा अनुगमन कार्यालयका प्रमुख मौवारले आगामी असारसम्म रुपनी छिन्नमस्ता सडकको काम सम्पन्न भइसक्ने प्रतिबद्धता जनाएको पालिका अध्यक्ष चौधरीले बताए ।
तोकिएको समयमा सडक निर्माणको काम नभए पालिकाले आफ्नो कार्यक्षेत्रभित्र पर्ने अधिकारको प्रयोग गरी अगाडि बढ्ने अध्यक्ष चौधरीले आयोजना प्रमुखलाई छलफलमा सुनाएका थिए ।
टेन्डर भएको २ बर्ष बितिसक्दा पनि कामले गति नलिएपछि सरोकारबालालाई राखेर छलफल नै गरेको उनले बताए ।
यसअघि उक्त सडक निर्माणको लागि पालिका अध्यक्ष चौधरीले भौतिक पूर्वाधारमन्त्री, मुख्य सचिव, सडक विभागप्रमुखदेखि प्रधानमन्त्री समेतलाई ज्ञापनपत्र बुझाएका थिए ।
सडकको काम पूरा भएपछि छिन्नमस्तामा आन्तरिक तथा वाहिरिय पर्यटकको संख्यामा उल्लेख्य वृद्धि हुने अध्यक्ष चौधरीले विश्वास व्यक्त गरेका छन् ।
’यो सडकले ऐतिहासिक धार्मिकस्थल छिन्नमस्ता शक्तिपीठ अवातजावतमा पर्यटकलाई सहज हुनेछ जसले यहाँ आन्तिरक तथा बाह्य पर्यटकको राम्रो संख्यामा बृद्धि हुन्छ,’ उनले भने, ’यसले यहाँको स्थानीय आर्थिक गतिविधिमा समेत टेवा पुग्नेछ ।’
