राजविराज । जनता समाजवादी पार्टी (जसपा) नेपालका अध्यक्ष उपेन्द्र यादवले पार्टी छाडेर गएकाहरूलाई फर्किन आग्रह गरेका छन् ।
यादवले शुक्रबार आह्वान पत्र जारी गर्दै पार्टी छाडेर गएका सबैलाई फर्किन आग्रह गरेका हुन् ।
स्वास्थ्य तथा जनसंख्या मन्त्री रहेको समयमा यादव देशबाहिर जाँदा उनको पार्टी फुटेको थियो । १२ मध्ये ७ जना प्रतिनिधी सभा सदस्य एवं केहि कार्यकारिणी सदस्य मिलेर पार्टी फुटाएका थिए । अशोक राईको नेतृत्वमा जसपा पार्टी गठन भएको थियो । अहिले यो पार्टीबाट प्रदीप यादव स्वास्थ्य तथा जनसंख्या मन्त्री बनेका छन् ।
आफ्ना पार्टीका नेता तथा सांसदले छुट्टै पार्टी बनाएपछि अध्यक्ष यादवले अलग भएर गएका विभिन्न तह तप्काका साथीलाई मूलधारमा फर्कन आह्वान गरेका छन् ।
जसपा नेपाल विशिष्ट सोच, सिद्धान्त र एजेन्डा बोकेको पार्टी भएको दाबी गर्दै यादवले जसपा नेपाल समाजवादी आन्दोलन, पहिचान, संघीयता र गणतन्त्रका सवालमा प्रतिवद्ध रहेको बताएका छन् ।
