शैलेन्द्र कुमार सिंह
राजविराज । सप्तरी निवासी एक महिलाको शव विराटनगरस्थित एक अस्पतालले बन्धक बनाएको पाइएको छ । विराट नर्सिङ अस्पतालले उपचार वापतको रकम नदिएको भन्दै सप्तरीको बलानबिहुल गाउँपालिका वडा नम्बर २ निवासी ४२ बर्षीया श्याम कुमारी रामको शव विगत तीन दिन देखि बन्धक बनाएर राखेको पाइएको हो ।
मृतकका पति उमेश रामले विराटनगरमा पत्रकार सम्मेलन गरी अस्पतालले ८ लाख रुपैया नतिरेसम्म शव लान नदिने बताएको जनाएका छन् । आफ्नी पत्नीको मृत्यु भएको तीन दिन भयो उनले भने, ‘शव माग्दा अस्पतालले पहिला उपचारको पैसा बुझाएपछि मात्रै शव दिने भन्दै आएको छ ।’
गत ५ चैतमा स १ त ३२८ नम्बरको ट्याक्टरले सप्तरीको बोदे बर्साइन नगरपालिका १ मा श्यामकुमारीलाई ठक्कर दिएपछि घाइते भएकी थिइन् । उनलाई उपचारको लागि विराट नर्सिङ होममा ल्याइएको थियो । उपचारको क्रममा ३ वैशाखमा उनको मृत्यु भएको पति उमेशले बताए ।
आर्थिक अवस्था नाजुुक रहेको रामको उपचारमा १२ लाख खर्च भएको उमेशले बताए । अस्पताल बाहेक फार्मेशीको मात्रै ८ लाखको बिल आएको उनले सुनाए । हस्पिटलको १२ लाख मध्ये चार लाख ७४ हजार रुपैयाँ र फार्मेशीको ८ लाख मध्ये ५ लाख २५हजार रुपैयाँ तिरिसकेको उनको भनाई छ ।
‘भएको सम्पती र ऋण खोजेर पत्नीको उपचारमा ९ लाख रुपैयाँ बुझाइसके । अब आउने कुनै श्रोत छैन्’ उनले भने ।
उनले पत्नीलाई ठक्कर दिने ट्याक्टर र चालकलाई प्रहरीले नियन्त्रणामा लिएको बताउँदै ठक्कर दिने गाडीवाट सवै खर्च नदिलाई शव नै बन्धकमा राखिएको बताए ।
विराट नर्सिङ होमका प्रशासन प्रमुख पदम बिनाडीले अस्पतालमा लागेको खर्च दिएपछि शव पठाईदिने बताए । उनले भने, ‘अस्पतालमा पनि यति धेरै खर्च हुन्छ । यसरी नै सबैलाई विरामीलाई हामीले निःशुल्क उपचार गर्दै पढाइ कहाँबाट हस्पिटल चल्छ ?’
