राजविराज । मधेश प्रदेशका मुख्यमन्त्री सतिशकुमार सिंहले राजविराज विमानस्थलबाट माउन्टेन फ्लाइट संचालनमा ल्याइदिन प्रधानमन्त्रीसँग आग्रह गरेका छन् ।
मंगलबार प्रधानमन्त्री केपी शर्मा ओलीलाई भेटेर मुख्यमन्त्री सिंहले यस्तो आग्रह गरेका हुन् । राजपविराज विमानस्थलबाट १० मिनेट मात्रै लाग्ने हुँदा माउन्टेन फ्लाइट संचालनमा ल्याइदिन उनले आग्रह गरेका हुन् ।
मुख्यमन्त्री सिंहले योसहित प्रदेशको समुन्नतिका लागि सहयोग गर्न प्रधानमन्त्रीसँग आग्रह गरे ।
प्रदेश सरकारले अघि सारेका कार्ययोजना कार्यान्वयनमा सहयोग गर्न आग्रह गर्दै सिंहले २२ बुँदे पत्र नै प्रधानमन्त्रीलाई बुझाए ।
पत्र मार्फत् जानकी मन्दिर विकास कोषको स्थापना तथा जानकी मन्दिर, राम मन्दिर प्राङ्गण सौन्दर्यीकरण, हुलाकी राजमार्गअन्तर्गत कमला पुललगायत अन्य पुल निर्माण कार्य पुरा गरी हुलाकी राजमार्गको कार्यको शीघ्र सम्पन्नता, निर्माणाधीन पूर्वपश्चिम रेलमार्गको प्रदेशका प्रमुख शहरसँग सम्पर्कको व्यवस्था, जनकपुर जयनगर रेल्वे यातायात मामालवाहक सेवाका लागि मालवाहक रेलको व्यवस्था गरिदिन, जनकपुरधामस्थित १२ बिघा (रङ्गभूमि) लाई सुव्यवस्थित गर्न आवश्यक पहल, मधेश प्रदेशका आठवटै जिल्लाहरू भारतीय नाकासँग जोडिएको हुनाले पर्यटक भित्र्याई पर्यटकीय कोरिडोर निर्माण गर्न र कमला नदीको बगरमा बगरखेतीका लागि आवश्यक आधुनिक प्रविधि तथा स्रोतसाधनमा सहयोग पु¥याउन आग्रह गरिएको छ ।
