नेपाली कांग्रेस सप्तरीको आन्तरिक विवाद टुँगिएकाे छ ।
पार्टीका केन्द्रीय प्रतिनिधि केन्द्रीय सदस्य ज्ञानेन्द्र बहादुर कार्कीको निर्देशन अनुसार पार्टीका जिल्ला सभापति रामदेव साहको तर्फबाट जिल्ला प्रबक्ता नन्दकिशोर यादव र शत्रुधन यादवको तर्फबाट क्षेत्र नम्बर ३ का सभापति भुपेन्द्र नारायण यादवको संयुक्त बैठकले ९ बुँदे सहमति गरेसँगै आन्तरिक विवाद टुँगिएकाे हाे ।
बैठकले संसदीय समितिमा एक जनाकाे नाम केन्द्रीय सदस्य दिनेशकुमार यादवले तथा जिल्ला सभापति रामदेव साह र शत्रुधन यादवले २/२ जनाकाे नाम दिने सहमति गरेको छ ।
जिल्ला समितिका दुई सभापतिमध्ये फतेह मोहम्मदलाई पहिलो र रामकुमार यादवलाई दोस्रो बरियतामा राख्ने, मनोनीत गरिएका काेषाध्यक्ष बिलट प्रसाद चौधरीलाई नै राख्ने, सह सचिव मनोज खडकाको निधन भएकाले उक्त पदमा स्वर्गीय खड्काकै परिवारलाई राख्ने सहमति दुबै पक्षबीच भएको छ ।
जिल्ला कार्यसमितिको बरियतामा सचिव प्रभुनारायण चाैधरीलाई राख्ने र दुबै सचिवकाे सहमतिमा कार्यालय सन्चालन गर्ने निर्णय भएको प्रबक्ता यादवले जानकारी दिए ।
नेविसंघ र तरुण दलको जिल्ला अध्यक्षलाई कायम राख्दै ६० प्रतिशत शत्रुधन यादव नेतृत्वले दिने नामलाई र बाँकी ४० प्रतिशत जिल्ला सभापतिले दिने नामलाई राख्ने निर्णय भएको छ ।
जिल्ला कार्य सम्पादन समिति २५ प्रतिशत सदस्य रहने बिधान अनुसारको समितिमा पदाधिकारीबाहेक जिल्ला कार्यसमिति सदस्यहरूबाट मनोनीत गर्नुपर्ने संख्याकाे ५५ प्रतिशत शत्रुधन यादव नेतृत्वबाट राख्ने र बाँकी जिल्ला सभापतिकाे तर्फबाट राख्ने निर्णय भएको छ ।
