राजविराज । राजविराज नगरपालिकाभित्रका बिटौरी र ब्लक जग्गाधनीहरुले दोस्रो चरणको आन्दोलन घोषणा गरेको छ ।
उनीहरूले गठन गरेको राजविराज नगरबासी पीडित संघष समितिले मंगलबार पत्रकार सम्मेलन गर्दै दोस्रो चरणको आन्दोलन घोषणा गरेको हो । विभिन्न ८ बुँदे माग अघि सार्दै आन्दोलनको घोषणा गरेका हुन ।
आन्दोलन अन्तर्गत बैशाख १८ गते बिहीबार राजविराज नगरपालिका भित्रका घर/घर र पसल पसलमा कालो झण्डा झुण्डयाउने, १६ गते शुक्रवार देखि स्थानीय गजेन्द्र चौकमा मागका पक्षमा हस्ताक्षर संकलन अभियान चलाउने, २१ गते आइतवार बिहान १० बजे नापी कार्यालय राजविराजमा १ घण्टा धर्ना दिने र २२ गते सोमवार बिहान १० बजे राजविराज नगरपालिका कार्यालयमा १ घण्टा धर्ना दिने कार्यक्रम तय गरिएको संघष समितिका संयाेजक इर्साद अन्सारीले जानकारी दिए ।
समितिले राजविराज नगरपालिकाको बिटोरी र ब्लक जग्गाको लालपूर्जाबाट बन्चित रहेका ५ हजार भन्दा बढी परिवारलाई अविलम्ब लाल पूर्जा प्रदान गर्नुपर्ने, राजविराज बसपार्क अविलम्ब संचालन गर्नुपर्ने, राजविराज हटियामा निर्माणाधीन व्यवसायिक कम्पलेक्सको निर्माण कार्य अविलम्ब सकाएर व्यापारीलाई हस्तान्तरण गर्नुपर्ने माग अघि सारेका छन् ।
यस्तै, खाडो नदी तटबन्ध क्षेत्रका जग्गाहरूको नापी अविलम्ब गर्नुपर्ने, राजविराज-कंचनपुर सड़क खण्डको निर्माण कार्यमा देखिएका समस्या अविलम्ब समाधान गर्नुपर्ने, सीमानाकामा विषादी परिक्षणका लागि क्वारेन्टाइनको व्यवस्था गर्नुपर्ने, लामखुट्टे नियन्त्रणका लागी नगर क्षेत्रमा अविलम्ब औषधी छर्कने व्यवस्था गर्नुपर्ने, सप्तरीको सिमानाका क्षेत्रमा वर्षों देखि बन्द रहेका छोटी भंसार कार्यालयहरू अविलम्ब संचालन गर्नुपर्ने माग समेत उनीहरूले गरेका छन् ।
घोषण गरिएको आन्दोलनबाट समेत माग पुरा नभए बैशाख २४ गते समिक्षा गरि तेस्रो चरणको आन्दोलन घोषणा गरिने पत्रकार सम्मेलनमा सदस्य शम्भुलाल देवले जानकारी दिए ।
