राजविराज । सप्तरीको रुपनी गाउँपालिकाले माछापालन गर्ने किसानलाई अनुदानको व्यवस्था गर्ने भएको छ ।
सोमबार आयोजना गरिएको पालिकाको सभामा यस्तो जानकारी दिइएको छ । सभामा नीति तथा कार्यक्रम प्रस्तुत गर्दै पालिका अध्यक्ष दिनेश यादवले कृषकहरुको वर्गीकरण गरी त्यसका आधारमा परिचय पत्र बितरण गरिने बताए । प्रत्येक किसानका लागि स्मार्ट मिटरको व्यवस्थापन गर्दै कृषि मिटर वापतको बिल पालिकाले भुक्तानी गर्ने नीति तथा कार्यक्रममा उल्लेख छ ।
गरिबी न्यूनिकरण तथा रोजगारीको अवस्था बृद्धि गर्न आवश्यक रणनीति बनाइने, गाउँपालिकामा संचालित संघ, प्रदेश र स्थानीय तहका योजनामा आवश्यक श्रमिक उपलब्ध भएसम्म रोजगार सेवा केन्द्रमा सुचिकृत बेरोजगार व्यक्तिहरुबाट नै काममा लगाउने, पालिकाभित्रका १५ देखि ६० बर्षसम्मका व्यक्तिहरुको नाम संकलन गरी सबै वडामा साक्षरता कार्यक्रम संचालन गरिने अध्यक्ष यादवले बताए ।
यस्तै, कक्षा १ देखि ३ सम्म अँग्रेजी माध्यममा पठनपाठ गराउने, कक्षा १ देखि १० सम्मका विद्यार्थीको परीक्षा शुल्क निःशुल्क गरिने, स्वास्थ्य चौकीहरुमा बर्थिङ्ग सेन्टर निर्माण गरी सेवा विस्तार गरिने, सबै वडाहरुमा स्वच्छ तथा सुरक्षित खानेपाानीको उपलब्धतामा जोड दिइने, सेफ्टिक टयांक सफा गर्न सहुलियत दरमा सेवा उपलब्ध गराउने, घुम्ती शौचालयको व्यवस्थापन गरिने, ज्येष्ठ नागरिकहरुको सम्मान तथा निःशुल्क स्वास्थ्य परीक्षण गर्ने नीति रुपनीले लिएको छ ।
