राजविराज । राजविराजस्थित गजेन्द्रनारायण सिंह अस्पतालको बिषयलाई लिएर सम्पूर्ण राजनीतिक दलका नेताहरु महिनाको एक पटक बैठक बस्ने भएका छन् ।
सोमबार बसेको सर्वदलीय बैठकले यस्तो निर्णय गरेको हो ।
अस्पतालमा कुनै समस्या देखिए लगत्तैै राजनीतिक दल एकजुट भई समाधान गर्ने, अस्पतालमा दरबन्दी भई बाहिर काम गरिरहेका चिकित्सकलाई फिर्ता बोलाउन एवं नयाँ दरबन्दी सृजना गर्न राजनीतिक दलले अबिलम्ब पहल गर्ने निर्णय पनि बैठकले गरेको छ ।
अस्पतालमा गल्ती गर्ने जोकोहिलाई पनि प्रशासन या प्रहरीले कार्वाही गरे राजनीतिक दल गल्ती गर्नेको पक्षमा नबोल्ने निर्णय बैठकले गरेको छ ।
अस्पतालको एचडियु, आइसियू संचालनका लागि मेडिकल अधिकृत र स्टाफ नर्स दैनिक ज्यालादारीमा नियुक्त गर्ने प्रकृया अगाडि बढाउने र आवश्यक अन्य दरबन्दी दैनिक ज्यालादारीमा नियुक्त गरेर भएपनि सेवालाई अवरुद्ध हुन नदिने निर्णय बैठकले गरेको अस्पतालका प्रमुख मेडिकल सुिपरिटेन्डेन्ट डा. प्रकाश शाहले जानकारी दिए ।
उनका अनुसार अस्पतालका सम्पूर्ण कर्मचारीले आफ्नो ड्यूटीको समयमा पोशाक र आइडी कार्डसहित इमान्दारीपूर्वक काम गर्ने निर्णय समेत गरिएको छ ।
यस्तै, अस्पतालको निर्माणाधीन भवन निर्माणको जिम्मा लिएका कन्टेक निर्माण कम्पनीलाई असार मसान्तभित्र तयार गरी उपलब्ध गराउने र नगराएमा कानुन अनुसार कार्वाही प्रकृया अघि बढाइने, स्वास्थ्य बिमालाई अझ प्रभावकारी बनाउँदै निःशुल्क पाइने औषधिको समुचित व्यवस्थापन गर्ने निर्णय भएको छ ।
मेडिकल सुपरिटेन्डेन्ट डा. शाहको अध्यक्षतामा भएको बैठकमा नेपाली कांग्रेसका जिल्ला सभापति रामदेव साह, नेकपा एमालेका जिल्ला सचिव देबनाथ यादव, नेकपा माओवादी केन्द्रका केन्द्रीय सदस्य सूर्यनाथ यादव, जसपा नेपालका अध्यक्ष केदार यादव, लोसपाका अध्यक्ष सुनिल झा, राष्ट्रिय मुक्ति पार्टीका अध्यक्ष दिपेन्द्र चौधरीसहितको सहभागिता थियो ।
हेर्नुहोस् निर्णयको प्रतिलिपी
