राजविराज । सप्तरीको शम्भुनाथ नगरपालिकाका कार्यवाहक नगरप्रमुख अनिता कुमारी चौधरीले आफ्नो नीजि पोखरी खन्न पालिकाको जेसिबी र इन्धन दुरूपयोग गरेको खुलेको छ ।
उनले आर्थिक बर्ष २०७९/८० र २०८०/८१ मा पालिकाको जेसिबी र इन्धन दुरुपयोग गरेको देखिएको हो । महालेखा परीक्षकको प्रतिवेदनले यस्तो औंल्याउँदै यस वापतको रु २ लाख ९ हजार ३०० असुल गर्न भनेपछि चौधरीले हालै पालिकाको राजस्व कोषमा यो रकम जम्मा गरेकी छन् ।
नगरपालिका श्रोतका अनुसार अख्तियाार दुरुपयोग अनुसन्धान आयोग समेतले यसमा चासो लिएपछि उनले हालै यो रकम नगरपालिकाको कोषमा जम्मा गरेकी हुन् ।
महालेखा परीक्षकको प्रतिवेदनले नगरपालिकाको वित्तीय व्यवस्थापनमा गम्भीर चुक देखाएपछि यसलाई ध्यानमा राख्दै अख्तियार दुरूपयोग अनुसन्धान आयोगले छानविन प्रकृया अगाडि बढाएको छ ।
नगरपालिकामा भइरहेको यस प्रकारका गतिविधि र विवादहरूले स्थानीय जनताको विश्वासमा ठूलो धक्का पुर्याएको छ । यसले नगरपालिकाको कार्यक्षमता र प्रशासनिक प्रणालीमा गम्भीर प्रश्न उठाएको छ ।
