राजविराज । नगरपालिकाका कर्मचारीहरु शुक्रबार (आज) देखि काममा फर्किने भएका छन् । असार मसान्तमा भुक्तानीसहितका काम प्रभावित हुने भन्दै कार्यपालिकाको आग्रह बमोजिम कर्मचारी काममा फर्किन लागेका हुन् ।
कर्मचारीको मागलाई यथावत राखी कर्मचारी तत्कालका लागि आन्दोलन छाडेर काममा फर्किने भएका हुन् । साउनको पहिलो साता मागको सुनुुवाई गर्ने बिहीबार बसेको कार्यपालिका बैठकमा छलफल भएको छ ।
बैठकले कर्मचारीको मागलाई सकारात्मक रुपमा लिएको कर्मचारीले बताएका छन् ।
‘कार्यपालिका बैठकमा हाम्रो जायज मागहरुप्रति दिईएको चासोप्रति यस ईकाइ समितिले सकारात्मक पहल भएको कुरालाई मनन गर्दै तथा कार्यपालिका वैठक मार्फत गरिएको निर्णय वमोजिम साउनको पहिलो सातामा पुनः छलफल तथा सहमतिका आधारमा हुने गरी कानून बमोजिम जायज माग तथा क्षतिपुर्ति समेत पुरा गर्ने र दोषी माथि आवश्यक कारवाही गर्ने प्रतिवद्धता गरेको छ’ नगरपालिका कर्मचारी एशोसिएशन इकाई समिति राजविराजका अध्यक्ष कल्पना देवले विज्ञप्ती जारी गर्दै बताएकी छन् ।
उनले यस ईकाइ समितिद्धारा गरिएको सम्पूर्ण संघर्षका कार्यक्रमहरु असार मसान्तलाई मध्यनजर गरी तत्काल स्थगित गरिएको बताएकी छन् । कार्यपालिकाको निर्णय वमोजिम तोकिएको समयसिमा भित्र जायज माग¸ क्षतिपुर्ति तथा दोषी माथि कार्वाही नभए पुनः यस ईकाइ समितिको वैठक बसी संघर्षका कार्यक्रमहरु घोषणा गरिने विज्ञप्तीमा भनिएको छ ।
