राजविराज । उच्च अदालत जनकपुर, राजविराज इजलासले अनुमति पाएको भन्दा माथिल्लो कक्षा संचालन नगर्न आदेश दिएपछि यसको अनुगमनलाई तिब्रता दिइएको छ ।
मंगलबार सदरमुकाम राजविराजस्थित झण्डै एक दर्जन संस्थागत विद्यालयको अनुगमन गर्दा कम कक्षाको अनुमति लिई माथिल्लो कक्षा संचालन गरेको पाइएको छ ।
म्याक्सेल इंगलिस बोर्डिङ्ग स्कुल कक्षा ८ को अनुमति लिएर कक्षा १० सम्म, स्टुडेन्ट लाइफ लेण्ड सेकेण्ड्री स्कुल कक्षा १ को अनुमति लिएर ३ सम्म, हिमालय एजुकेशनल एकेडेमी बिना अनुमतिको ५ कक्षासम्म, डायनामिक स्कुल ८ को अनुमति लिएर १० सम्म, पिसलेन्ड इंगलिस स्कुल ७ को अनुमति लिएर १० सम्म संचालन गरेको पाइएको छ ।
यस्तै, जेभिएस स्कुल पूर्व प्राथमिक तहको अनुमति लिएर ४ कक्षासम्म संचालन गरेको पाइएको शिक्षा समन्वय समितिका अधिकृत कमलनाथ यादवले जानकारी दिए ।
उनका अनुसार सगरमाथा इंगलिस बोर्डिङ्ग स्कुलको नाममा अनुमति लिई डायनामिक स्कुल संचालन गरिरहेको पाइएको छ ।
मंगलबार संस्थागत विद्यालयको अनुगमन गर्दा अनुमति लिएको भन्दा माथिल्लो कक्षा संचालन गरेको पाइएको यादवले बताए ।
उनले सामुदायिक विद्यालयमा नाम लेखिएका बालबालिका पनि अध्ययन गराइरहेको पाइएको जानकारी दिए ।
यस्तो नगर्न हामीले लिखित हस्ताक्षरै गराएका छौं’ उनले भने, ‘अर्का पटक पनि अनुमति बिनाको कक्षा संचालन गरेको पाइए कार्वाही गर्नेछौं ।’
अनुगमनमा जाँदा विद्यालय संचालकले ट्युसन पढाइरहेको प्रतिकृया दिएका थिए । तर विद्यालयको समयमा विद्यालयकै पोशाकमा कक्षा पढाइरहेको पाइएको उनले बताए ।
यसअघि सोमबार सदरमुकाम राजविराज नगरपालिका वडा नम्बर २ राजदेवी चोकमा संचालित कृष्णा एकेडेमी विद्यालयमा संचालित माथिल्लो कक्षा बन्द गराइएको थियो ।
कक्षा १ को अनुमति लिएर कक्षा ७ सम्म संचालन भएको पाइएपछि माथिल्लो कक्षा बन्द गराइएको थियो ।
उच्च अदालत जनकपुर, राजविराज इजलासले १९ बैशाखमा अनुमति पाएको भन्दा माथिल्लो कक्षामा भर्ना नगर्न अन्तरिम आदेश दिएपछि शिक्षा समन्वय इकाईले नियमित अनुगमन गर्दै आएको छ ।
