राजविराज । सप्तरी प्रहरीको प्रमुख भएर ढकेन्द्र खतिवडा आएपछि फरार रहेका ४०४ जना प्रतिवादी पक्राउ परेका छन् ।
खतिवडाको सरुवा भएपछि जिल्ला प्रहरीले उनको कार्यकालमा भएका काम सार्वजनिक गरेको हो । ४०४ जना फरार प्रतिवादी पक्राउ परेपछि जरिवाना वापतको रु २६ लाख ६१ हजार २५२ तथा जम्मा कैद १०१ बर्ष १० महिना १० दिन भुक्तान भएको छ ।
खतिवडाको नेतृत्वमा ६ हजार ६६६ किलो ९२१ ग्राम लागूऔषध गाँजा, १ दशमलव ४ ग्राम ब्राउन सुगर, ८७२ थान अन्य लागूऔषध बरामद भएको सप्तरी प्रहरीका प्रबक्ता एवं डीएसपी जितेन्द्र कुमार बस्नेतले जानकारी दिए ।
लागूऔषधतर्फ ३५ जना पक्राउ गरी ३१ जनालाई मुद्दा चलाएको बस्नेतले विज्ञप्ती मार्फत् जनाएका छन् ।
अवैध भन्सार चोरी निकासीका अन्दाजी रु २ करोड ५८ लाख ६४ हजार बराबरको सामान नियन्त्रणमा लिई भन्सार कार्यालयमा बुझाएको, लागूऔषधतर्फ १३ वटा र चोरी निकासीतर्फ ४६ वटा सबारीसाधन नियन्त्रणमा लिएको विज्ञप्तीमा उल्लेख गरिएको छ ।
स्थानीय पालिकाहरुसँग आवश्यक समन्वय गरी प्रहरीको मनोबल वृद्धि गर्नको लागि जुनियर प्रहरी अधिकृत व्यारेक, प्रहरी हवल्दार व्यारेक र प्रहरी जवानका व्यारेकमा १० थान एसी जडान गरी संचालनमा ल्याएको, खानेपानी डिभिजन कार्यालय, सप्तरीसँगको समन्वयमा कार्यालय परिसरको भित्र सेवाग्राहीका लागि शौचालय निर्माण अन्तिम चरणमा रहेको, निवेदन/उजुरी तथा सेवाग्राहीहरुको चापलाई मध्यनजर गरी यसको सहज व्यवस्थापनका लागि स्थानीय पालिकासँग समन्वय गरी छलफल कार्यका लागि दुई कोठे भवन निर्माण कार्य भइरहेको, सप्तरी उद्योग बाणिज्य संघसँग समन्वय गरी शुद्ध खानेपानी खुवाउन ४ थान वाटर केन्ट संचालनमा ल्याएको विज्ञप्तीमा जनाइएको छ ।
