राजविराज । आर्थिक रुपले विपन्न रहेका देव समुदायका पाँच जना विद्यार्थीलाई अध्ययनका लागि सहयोग गरिएको छ ।
दिलिप–सुशिला चौधरी स्मृति ट्रष्टले पाँच जना विद्यार्थीका साथै अन्य दुई जनालाई समेत सहयोग उपलब्ध गराएको छ ।
आर्थिक अवस्था कमजोर रहेका ५ जना विद्यार्थीलाई रु २० हजारका दरले, एक जनालाई रु ७ हजार र अर्को एक जनालाई रु दुई हजार सहयोग उपलब्ध गराइएको ट्रष्टका अध्यक्ष प्रकाशनारायण चौधरीले जानकारी दिए ।
राजविराज–६ स्थित वागेश्वरी मन्दिर प्राङणमा आयोजित अन्तर्राष्ट्रिय देव महासम्मेलनमा उनीहरुलाई सम्मान गरिएको हो ।
प्रकाशनारायणले आफ्ना माता सुशिला र पिता दिलिपको स्मृतिमा यो ट्रष्ट निर्माण गरेका हुन् । ट्रष्ट मार्फत् आर्थिक अवस्था कमजोर रहेका स्वजातीयलाई सहयोग गर्ने उद्देश्य लिएको प्रकाशनारायणका भाई समेत रहेका नेकपा एसका सप्तरी अध्यक्ष प्रतापनारायणले जानकारी दिए ।
उनले तीन जना दाजुभाई मिलेर ट्रष्टको स्थापना गरिएको जानकारी दिए ।
