मधेश सम्वाददाता
राजविराज, १८ भदौ ।
संघीय सरकारले सप्तरीको दुई पालिकाका केहि वडासहित तीन जिल्लाका १६ वडालाई विपद् संकटग्रस्त क्षेत्र घोषणा गरेको छ ।
गृह मन्त्रालयले गत साउन १७ मा सप्तकोसी नदीमा आएको भेल÷बाढीबाट प्रभावित सप्तरीसहित उदयपुर र सुनसरीका ४ पालिकाका १६ वडालाई २०७९ पुस मसान्तसम्मका लागि विपद् संकटग्रस्त क्षेत्र घोषणा गरेको हो ।
सप्तरीको सप्तकोसी नगरपालिका वडा नम्बर ६, ७ र ९ तथा कंचनरुप नगरपालिकाको वडा नम्बर १, २, ४, ५, ६ र १० लाई विपद् संकटग्रस्त क्षेत्र घोषणा गरिएको गृह मन्त्रालयले जनाएको छ ।
यस्तै, उदयपुरको बेलका नगरपालिकाका वडा नम्बर १ २, ३, ८ र ९ वडा तथा सुनसरीको बराहक्षेत्र नगरपालिका वडा नम्बर ६ र ९ लाई पनि संकटग्रस्त क्षेत्र घोषणा गरिएको छ ।
विपद् जोखिम न्यूनीकरण तथा व्यवस्थापन ऐन २०७४ को दफा ३२ मा उपदफा १ मा ‘नेपालको कुनै ठाउँमा गम्भीर प्रकृतिको विपद् उत्पन्न भएकोले विपद् संकटग्रस्त क्षेत्र घोषणा गर्न आवश्यक देखिएमा नेपाल सरकारले नेपाल राजपत्रमा सूचना प्रकाशन गरी त्यस्तो क्षेत्रको सीमाना र अवधि तोकी विपद् संकटग्रस्त क्षेत्र घोषणा गर्नेछ’ भनिएको छ ।
