मधेश सम्वाददाता
राजविराज, १८ भदौ ।
सुनसरीमा भएको सबारी दुर्घटनामा सप्तरीका दुई जनाको ज्यान गएको छ ।
पूर्व–पश्चिम राजमार्ग अन्तर्गत सुनसरीको कोशी गाउँपालिका सडक खण्डमा भएको सवारी दुर्घटनामा उनीहरुको मृत्यु भएको प्रहरीले जनाएको छ ।
कोशी गाउँपालिकामा पूर्वबाट पश्चिम तर्फ जाँदै गरेको को २ च २६४९ नम्बरको पिकअप भ्यानले विपरित दिशाबाट आउँदै गरेको बा ६० प ४४९२ नम्बरको मोटरसाइकललाई ठक्कर दिँदा उनीहरुको ज्यान गएको हो ।
मोटरसाइकलमा सवार सप्तरीको सप्तकोशी नगरपालिका १ बस्ने ३५ बर्षीय प्रकाश गोजेवार र सोही नगरपालिकाको वडा नम्बर ६ बस्ने ३६ वर्षीय दुर्गानन्द चौधरीको मृत्यु भएको छ ।
गम्भिर घाइते भएका दुवैलाई उपचारका लागि जिल्ला अस्पताल इनरुवा लगिएको थियो ।
गोजेवारको इनरुवा र चौधरी थप उपचारको लागि विपि कोइराला स्वास्थ्य विज्ञान प्रतिष्ठान धरान लैजाने क्रममा बाटैमा मृत्यु भएको प्रदेश ट्राफिक प्रहरी कार्यालय इटहरीले बताएको छ ।
