अन्ततः तीन दिनदेखिको तनाव सप्तरीमा अन्त्य भएको छ । सामाजिक संजालमा एक जनाले हिन्दु धर्मका भगवान श्रीकृष्णको बिषयमा घृणित टिप्पणी गरेपछि एक्कासी राजविराजसहित जिल्लाका अन्य ठाउँहरु पनि तनावग्रस्त बन्न पुगेको थियो । शुक्रबार हिन्दु सम्राट सेनासहितका हिन्दु संघ–संगठनले सदरमुकाम राजविराज बजार बन्द गराए । यसको असर जिल्लाको अन्य ठाउँहरुमा पनि पर्यो । त्यस दिन जिल्लाको व्यापार र यातायात दुबै ठप्प रह्यो । सोही दिन जिल्ला प्रशासन कार्यालयमा बसेको बैठकमा घृणित टिप्पणी गर्ने व्यक्तिले लिखित र मौखिक रुपमा माफी मागेपछि विवादको अन्त्य भयो । सहमति भए लगत्तै केही युवाले तनावको स्थिति सृजना गर्न खोजेपछि प्रहरीले साम्य पारेको थियो ।
सप्तरी जिल्लामा बिभिन्न धर्माम्बलीहरु बर्षौदेखि बस्दै आएका छन् । अरु जिल्लाजस्तो यहाँ कुनै पनि विवाद नभएको स्थितिमा एक्कासी यस किसिमको रुप लिनु आफैं डरलाग्दो कुरा हो । यसले कसैको फाइदा पुर्याउँदैन् । क्षतिबाहेक केही उपलब्धी हुँदैन् । विगतजस्तै सौहार्दता, सहिष्णुता कायम राख्नु सबैका लागि जरुरी छ । कुनै पनि धर्मका व्यक्तिले अन्य धर्मबिरुद्ध नबोलेकै राम्रो हुन्छ । यसले बर्षौदेखिको मित्रता, सौहार्दता र सहिष्णुतालाई एकछिनमै धुमिल बनाइदिन्छ । अन्य जिल्लाहरुमा भएको घट्नालाई नियाँलौं । धेरै क्षति व्यहोर्नुपरेको छ । क्षति त हुन्छ नै समाजमा बिग्रहको स्थिति पनि उत्पन्न हुन्छ । एकअर्काबीच विवाद बढ्दा समाज नै तहसनहस हुन्छ ।
हो, कसैले गल्ती नै गरेको छ भने उसलाई कानुन अनुसारको कार्वाही गराउन अगाडि बढ्नुपर्छ । एक जनाले गल्ती गर्दैमा समग्र समुदायलाई नै गालीगलौज गर्नु न्यायोचित्त हुन सक्दैन् । सिद्धान्तले के भन्छ भने गलत गर्नेको कुनै धर्म हुँदैन् । कुनै धर्मका व्यक्तिले अपराधै गरेको छ भने सबै मिलेर त्यसलाई कानुन अनुसारको कार्वाही गराउनुपर्छ, तोडफोड, आगजनी गर्नुहुँदैन् । यसले कसैको पनि भलो हुन सक्दैन् । जहाँ अशान्ति हुन्छ, जहाँ एकअर्काबीच विवाद हुन्छ, त्यहाँको विकासीय गतिमा समेत ब्रेक लाग्ने गरेको इतिहासबाट पाठ सिक्नु सबैका लागि आवश्यक छ । एकले अर्काको अस्तित्व स्वीकार गरी समाजलाई अघि बढाउनु नै अहिलेको आवश्यक्ता हो । यसतर्फ हामी सबैले मनन गर्नु जरुरी छ ।
