राजविराज । इन्टेलेक्चुअल फाउण्डेशन नेपालले राजविराजस्थित गजेन्द्रनारायण सिंह अस्पताललाई सुधार गर्न आग्रह गर्दै मेडिकल सुपरिटेन्डेन्टलाई ध्यानाकर्षण पत्र बुझाएको छ ।
अस्पतालको अवस्था खस्किनुका बिभिन्न कारण देखाउँदै फाण्डेशनले सुधारका निम्ति ध्यानाकर्षण पत्र मार्फत् आग्रह गरेको हो ।
बन्द रहेको अस्पतालको एचडियु र एनआइसियु सेवा सुचारु गराउन, ओपिडी र आकस्मिक वार्डमा नेपाल सरकारले तोकेको खाजा समयबाहेक चिकित्सकहरुलाई डिउटीमा खटाउन, नेपाल सरकारद्वारा बिमा सेवा र आकस्मिकका लागि तोकिएको औषधि बिरामीलाई प्रदान गर्न, ल्याबका कर्मचारीहरु बाहिर ल्याब संचालन गरिरहेकाले अस्पतालमै ल्याब परीक्षण गराउन, अस्पतालको सरसफाई गराउन आग्रह गरिएको फाउण्डेशनका अध्यक्ष डा. सुर्या यादवले जानकारी दिए ।
यस्तै, सामान खरीद भएपनि संचालन हुन नसकेको आइसियू सेवा संचालन गर्न, आकस्मिकसहित अस्पतालका अन्य वार्डहरुमा खटिने चिकित्सकको ड्रेसिङ्ग कक्ष बस्ने लायक नभएको र आकस्मिक कक्षमा प्रवेश गर्ने र बाहिरिने बाटो समेत बिरामीका लागि सहज नभएकाले सहज बनाउन, अस्पतालजस्तो संवेदनशिलक्षेत्रमा करार कर्मचारीको छनौट हाम्रोभन्दा राम्रो मापदण्डबाट गरिदिन ध्यानकर्षण पत्रमा आग्रह गरिएको छ ।
सप्तरी जिल्लाबासीकै आस्थाको केन्द्रको रुपमा रहेको एक मात्र संघीय गजेन्द्रनारायण सिंह अस्पताल रेफरल सेन्टरको रुपमा परिणत हुँदै गएको भन्दै ध्यानाकर्षण पत्रमा भनिएको छ, ‘मेसुज्यू तपाईं जिल्लाबासी पनि हुनुहुन्छ । त्यसैले यो विषहरुमा यथासिघ्र कडा कदम चाल्न बिनम्र अनुरोध छ ।’
