राजविराज । सप्तरी क्षेत्र नम्बर ३ मा राष्ट्रिय स्वतन्त्र पार्टी (रास्वपा) बाट उम्मेदवारी दिएका अमरकान्त चौधरीले चुनाव लक्षित करार पत्र सार्वजनिक गरेका छन् ।
उनले राष्ट्रियका साथै स्थानीय समस्या समाधान गर्ने प्रतिबद्धतासहित करार पत्र सार्वजनिक गरेका हुन् ।
बल र बिऊ सहज तरिकाले उपलब्ध गराउने, युवालाई स्वरोजगारमा प्रोत्साहन गर्ने, भ्रष्टाचार र सामाजिक विकृति उन्मुलन गर्ने, सिंचाईका लागि विद्युत उपलब्ध गराउने, विद्यार्थीलाई छात्रबृत्तिको व्यवस्था गर्ने, जन्मदेखि मृत्युसम्म एकीकृत सामाजिक सुरक्षाको ग्यारेन्टी गर्ने प्रतिबद्धता उनले व्यक्त गरेका छन् ।
यस्तै, स्वास्थ्य बिमा निःशुल्क व्यवस्था गर्ने, विदेशमा बस्ने नेपालीलाई अनलाइन मताधिकार दिने, सरकारी कार्यालयमा लाइन बस्नुनपर्ने उनले करार पत्रमा उल्लेख गरेका छन् ।
आफ्नो पार्टी जितेमा देशभरिमा १२ लाख नयाँ रोजगारी सृजना गर्ने, ३० हजार किलोमिटर राष्ट्रिय राजमार्ग निर्माण गर्ने, प्रतिव्यक्ति आय ३ हजार डलर पुर्याउने प्रतिबद्धता उनले बताए ।
उक्त अवसरमा रास्वपाका समानुपातिक उम्मेदवार डा. अंकिता ठाकुरले देशलाई परिवर्तन गर्न, भ्रष्टाचारको अन्त्य गरी विकासको पथलाई अगाडि बढाउन आफूहरु लागिपर्ने बताइन् ।
