मधेश सम्वाददाता
जनकपुरधाम, २५ भदौ ।
जनता समाजवादी पार्टी (जसपा) का अध्यक्ष उपेन्द्र यादवले ऐतिहासिक मधेश जनविद्रोह लगायतका आन्दोलनमा बीर सपूतहरुको बलिदानीकै कारण मधेशी जनता देशको नागरिक बनेको बताएका छन् ।
मधेश आन्दोलनका क्रममा धनुषामा शहीद भएका दिलिप यादव, निकु यादव र संजय चौधरीको स्मरणमा शनिबार जनकपुरधामस्थित शहीद गेट अगाडि आयोजित कार्यक्रमलाई सम्बोधन गर्दै अध्यक्ष यादवले उक्त कुरा बताएका हुन् । ‘मधेशसहित बिभिन्न आन्दोलन अगाडि मधेशीलाई नेपाली नागरिक पनि मानिएको थिएन्’ अध्यक्ष यादवले भने, ‘बिहारी, धोती अरु के–के शब्दले सम्बोधित गर्ने गरिन्थ्यो’ अध्यक्ष यादवले भने, ‘बीर सपूतको बलिदानीकै कारण संघीय गणतन्त्र नेपाल बनेपछि अहिले त्यस्तो सम्बोधित गर्ने कार्य बन्द भएको छ ।’
शहीदको बलिदानीकै कारण एकात्मक र निरंकुश शाषण प्रणालीलाई फ्याँकेर संघीय लोकतान्त्रिक गणतन्त्रको स्थापना भएको उनले बताए ।
लोकतन्त्र र संघीयताबिरोधी शक्ति, विभेदकारी शाषकवर्ग आज पनि संघीय गणतन्त्रलाई समाप्त गर्ने खेलमा लागेको भन्दै अध्यक्ष यादवले यसको रक्षा गर्नु पहिलो दायित्व भएको बताए ।
समाजमा धेरै प्रकारको विभेद र असमानता बिद्यमान रहेको भन्दै उनले महिलाप्रतिको असमानता, विभेद र हिंसा अहिले पनि समाजमा जकडिएर बसेको बताए । यसबाहेक दलितहरुप्रतिको अमानवीय व्यबहार, मानवअधिकारको हनन, अवसर र सम्भावनाबाट बंचित गर्ने व्यबहार अहिले पनि समाजमा कायमै रहेको, अल्पसंख्यक समुदाय अधिकारबाट बंचित रहेको अध्यक्ष यादवले बताए । जाती र भाषा र संस्कृतिको आधारका साथै अरु धेरै आधारमा समाजमा विधेद र असमानता शोषण र उत्पीडतन कायम रहेको भन्दै उनले जबसम्म यस्ता विभेदलाई जडबाटै उखालेर नफयाँकेसम्म शहीदको सपना पूरा गर्न नसकिने उनले बताए ।
यस्तै, पिछडावर्ग महासंघ (ओबिसी) को राष्ट्रिय सम्मेलनलाई जनकपुरधाममा शनिबार सम्बोधन गर्दै अध्यक्ष यादवले सम्मानजनक सिटमा तालमेल भए मात्रै गठबन्धन पनि बलियो हुने बताएका छन् । प्रतिगमनबिरुद्धको लडाईमा आफ्नो पार्टीको ऐतिहासिक भूमिका रहेको भन्दै आगामी चुनावका लागि सम्मानजनक सिटमा तालमेल हुनुपर्ने उनले बताए ।
आफूहरु गठबन्धनबाटै चुनावमा जान खोजेको भन्दै अध्यक्ष यादवले गठबन्धनबाट कुनै आत्मघाती कदम उठाउन तयार समेत नरहेको बताए ।
मधेशको शक्तिको रुपमा रहेको जसपालाई कमजोर रुपमा नहेर्न उनले कांग्रेस कम्युनिष्टलाई चेतावनी नै दिए ।
