राजविराज । दशैंसहितका चाडपर्वलाई लक्षित गर्दै शनिबारदेखि लामो तथा मध्यम दूरीका यात्रुवाहक बसको अग्रिम टिकट बुकिङ खुलेको छ ।
यातायात व्यवसायीहरूको संस्था राष्ट्रिय यातायात व्यवसायी महासंघका अनुसार शनिबारदेखि अग्रिम टिकट बुकिङ खोलिएको छ । काठमाडौंमा टिकट बुकिंग खोलिएपछि भाडादरबारे पनि जानकारी गराइएको छ ।
अब कुनै पनि ठाउँबाट राजविराज आईपुग्न कति भाडा तिर्नुपर्ने हुन्छ ? सरकारले केहि दिनअघि निर्धारण गरेको भाडा अनुसार अब काठमाडौंदेखि राजविराजबीचको भाडा १३ सय कायम भएको छ । यसअघि ४५० किलोमिटरको दूरी रहेको राजविराज–काठमाडौंको भाडा १२ सय ७७ थियो । बनेपा–काठमाडौं–मुग्लिन हुँदै राजविराज पुग्न १४ सय ५ रुपैयाँ भाडा तोकिएको छ । ४८४ किलोमिटर दूरी रहेको यो रुटको भाडा यसअघि १३ सय ८० थियो ।
काठमाडौंको नयाँ बसपार्क–खुर्काेट हूँदै राजविराज आउनलाई ११५२ रुपैयाँ भाडा तोकिएको छ । यो रुट ३०७ किलोमिटरको छ ।
राजविराजदेखि विराटनगरसम्मको ९७ किलोमिटर दूरीको भाडा अब २८३ तिर्नुपर्ने हुन्छ । यसअघि २७८ कायम थियो ।
राजविराजबाट झापाको भद्रपुर पुग्न ४९४ रुपैयाँ भाडा तिर्नुपर्ने हुन्छ । यसअघि रु ४८४ भाडा रहेको राजविराजदेखि भद्रपुरको दूरी १६७ किलोमिटर छ ।
राजविराजदेखि ७८ किलोमिटरको दूरीमा रहेको इटहरीको भाडा २३२ र ८८ किलोमिटर दूरीमा रहेको कटारीको भाडा २५९
राजविराज–धरानको भाडा २६८ कायम गरिएको छ । राजविराजदेखि धरानको दूरी ९३ किलोमिटर छ ।
काकडभिट्टा कुनौली हुँदै राजविराज १६९ किलोमिटर दूरीको भाडा ४९७ कायम गरिएको छ । काकडभिट्टा–राजविराजदेखि हनुमाननगरसम्मको रु ४७० भाडा तोकिएको छ ।
राजविराजबाट नेपालगंज जान अब १९ सय २१ रुपैयाँ भाडा तिर्नुपर्ने हुन्छ । ६९३ किलोमिटर दूरी रहेको नेपालगंज पुग्न यसअघि १८ सय ८८ रुपैयाँ भाडा तोकिएको थियो ।
