राजविराज । सप्तरीमा आत्महत्या गर्नेको संख्या बढ्दै गएको छ । प्रहरीले उपलब्ध गराएको तथ्यांकलाई हेर्ने हो भने अवस्था डरलाग्दो देखिन्छ ।
पछिल्लो साउन र भदौ महिनामा मात्रै २२ जनाले आत्महत्या गरेका छन् । साउनमा १३ जना र भदौमा ९ जनाले आत्महत्या गरेको जिल्ला प्रहरी कार्यालयले जनाएको छ ।
साउनमा ४ जना पुरुष र ६ जना महिलाले झुण्डिएर तथा ३ जना महिलाले बिष खाएर आत्महत्या गरेका छन् ।
भदौमा झुण्डिएर ४ जना पुरुष र दुई जना महिला तथा बिष खाएर तीन जना महिलाले आत्महत्या गरेको सप्तरी प्रहरीका प्रबक्ता एवं डीएसपी माधव प्रसाद काफ्लेले जानकारी दिए ।
पछिल्लो ३८ महिनाको तथ्यांकलाई हेर्ने हो भने आत्महत्याको दर बढ्दै गएको छ । आर्थिक बर्ष २०७६÷७७ मा ९५ जनाले आत्महत्या गरेका छन् । बिष खाएर २१ महिला र ९ पुरुष, झुण्डिएर २५ जना महिला र ३९ जना पुरुष तथा आगो लगाएर एक जना महिलाले आत्महत्या गरेका छन् ।
आ.ब. २००७७÷७८ मा आत्महत्याको दर अघिल्लो बर्षभन्दा बढेको देखिएको छ । यो बर्षमा ११८ जनाले आत्महत्या गरेका छन् ।
बिष खाएर २१ महिला र १६ पुरुष गरी ३७ जना, झुण्डिएर ३४ महिला र ४७ पुरुष गरी ८१ जनाले आत्महत्या गरेका छन् ।
आ.ब. २०७८÷०७९ मा आत्महत्या गर्नेको संख्या १३६ देखिएको छ । यो बर्ष बिष खाएर १९ पुरुष र १३ महिला गरी ३२ जना तथा झुण्डिएर ५६ महिला र ४८ पुरुष गरी १०४ जनाले आत्महत्या गरेका छन् ।
