मधेश सम्वाददाता
राजविराज, ३ असोज ।
आफ्ना पतिको हत्या गर्नेलाई कार्वाही हुने विश्वास सप्तरीकी एक महिलाले गरेकी छन् ।
शम्भुनाथ नगरपालिका ३ कचन्दाहा निवासी घुरनीदेवी रामले आफ्ना पति त्रिुवन रामको हत्या गर्नेलाई कार्वाही हुने र आफूले न्याय पाउने विश्वास गरेकी छन् ।
छोरीको सामुहिक बलात्कारपछि न्यायका लागि कानूनी बाटोमा लागेका पतिको पनि हत्या भएको उनको भनाई छ । सोमबार राजविराजमा पत्रकार सम्मेलन गर्दै उनले पति हत्या आरोपमा पक्राउ परेका चार जनालाई कार्वाही हुने विश्वास व्यक्त गरिन् ।
उनका अनुसार २०७५ सालमा छिमेकीहरु बबी चौधरी, मनोज साह, अर्जुन साह, एथलेटिक चौधरीसहित ५ जनाले आफ्नी १४ वर्षीया छोरीमाथि सामुहिक बलात्कार गरेका थिए । न्यायका लागि आफुहरु कानूनी बाटोमा लागेको अवस्थामा बलात्कारीहरुले ज्यानै मार्नेसम्मको धम्की दिन थालेपनि आफुहरु पछि नहटेको उनले बताइन् ।
बलात्कार घटनामा संलग्नका आफन्तहरुले दिएको धम्की नै अनुसार २०७७ असार २९ गते पति त्रिभुवन रामलाई वेपत्ता पारिएको र त्यसको भोली पल्ट मुतनी नदीमा पतिको शव फेला परेको उनले सुनाइन् । घट्ना भएको १६ दिनपछि प्रहरीले प्रभु साह, शम्भु चौधरी, पंकज चौधरी र सुरेन्द्र पाललाई पक्राउ गरेपछि अहिले उनीहरुलाई पुर्पक्षका लागि कारागार पठाइएको उनले बताइन् । ‘घटना गराउने ३ जना अझै फरार रहेको भन्दै उनले पुर्पक्षका लागि कारागारमा रहेकालाई धरौटीमा छाड्ने हल्ला आफूले सुनेको उनले बताइन् । ‘यदी उनीहरु छुट्यो भने हामीलाई पनि मारेर छाड्छ’ उृनले भनिन्, ‘हामी न्याय पाउँछौं भन्ने विश्वास छ ।’
यसअघि छोरीको बलात्कार घटनामा पक्राउ परेकामध्ये बबी चौैधरी बाहेक सबैलाई धरौटीमा छाडिसकेकाले यस पटक त्यस्तो नहुने उनको भनाई छ । ‘सामुहिक बलात्कार घटनाका दोषीहरु त्यसै बाहिर घुमिरहेको हेर्दा पतिको हत्या घटनामा पनि न्याय नपाउने हो कि ? भनेर चिन्ता थपिएको छ’ उनले भनिन्, ‘यदी यस्तो भयो भने हामी अझ असुरक्षित हुन्छौं ।’
न्याय दिलाइदिन उनले सबैसँग आग्रह गरेकी छन् ।
‘आफ्ना २१, १८ र ११ वर्षीया गरी ३ छोरी र एक ७ वर्षीय छोरा छन्, एउटी छोरीको विहे भइसकेको छ, अन्य सन्तान र आफुलाई कसरी सुरक्षित राख्ने ?’ उनले दुःखेसो पोखिन् ।
