राजविराज । राष्ट्रपति विद्यादेवी भण्डारीको पुत्ला जलाउने क्रममा बुधबार राजविराजमा लोकतान्त्रिक समाजवादी पार्टी (लोसपा) का नेता÷कार्यकर्ता र प्रहरीबीच घम्साघम्सी भएको छ ।
नागरिकता विधेयक प्रमाणित नगरेको बिरोधमा लोसपाका नेता÷कार्यकर्ताले स्थानीय जनआन्दोलन चोकमा राष्ट्रपति भण्डारीको पुत्ला जलाउने कार्यक्रम तय गरेको थियो । पुत्ला जलाउन लाग्दा पुगेको प्रहरी टोलीले पुत्ला खोसेको थियो । पुत्ला खोसेपछि लोसपा नेता÷कार्यकर्ता र प्रहरीबीच केहि बेर घम्साघम्सी भएको थियो ।
पुत्ला जलाउनेअघि राष्ट्रपतिबिरुद्ध लोसपाका नेता तथा कार्यकर्ताहरूले प्रदर्शन गरेका थिए । दुई पटक संसदबाट पारित भएको नागरिकता विधेयकलाई प्रमाणीकरण नगरेर राष्ट्रपतिले संसदीय प्रणालीको उपहास गरेको भन्दै उनीहरुले प्रदर्शन गरेका हुन् ।
लोसपाको जिल्ला कार्यालयबाट निकालिएको जुलुस नगरको विभिन्न भागको परिक्रमा गरेको थियो । प्रदर्शनमा सहभागीहरूले राष्ट्रपति भण्डारीकाविरुद्ध चर्को नाराबाजी गर्दे राजिनामा दिनुपर्ने माग गरेका थिए ।
लोसपाले प्रदर्शन गर्न लागेको सूचना पाएपछि राजविराजमा व्यापक रुपमा नेपाल तथा सशस्त्र प्रहरी परिचालन गरिएको थियो ।
