मधेश सम्वाददाता
राजविराज, ७ माघ ।
जनमत पार्टीका अध्यक्ष डा. सिके राउतले ५ माघमा संसदमा शहीदप्रति मौन धारण गरेको र गराएको कार्यलाई राप्रपाका अध्यक्ष समेत रहेका उपप्रधानमन्त्री एवम् ऊर्जा, जलस्रोत तथा सिँचाईमन्त्री राजेन्द्र लिङ्देनले संसदीय मर्यादा विपरीतको संज्ञा दिएका छन् ।
शनिबार बसेको प्रतिनिधीसभाको बैठकमा बोल्दै लिङदेनले यस्तो बताएका हुन् । डा. राउतले गरेको काम संसदीय मर्यादा र नियमि विपरित रहेको उनको भनाई छ । ‘त्यहीं भएर प्रधानमन्त्री पुष्पकमल दाहालसहित आफूहरूले मौन धारण गर्ने काममा सहभागी भएनौं’ उनले बताए ।
लिङदेनले संसद्को एउटा मर्यादा र नियम रहेको भन्दै यहाँ सभामुखको रुलिङ चल्ने गरेको बताए । आफू कुनै भावना वा बहानाले बगे भने त्यसले संसदीय परम्परामा रामो छाप नछोड्ने भएकाले सभामुखले रुलिङ नगरेसम्म या प्रधानमन्त्री नउठेसम्म आफूलाई उठन नमिल्ने उनले बताए ।
मधेश आन्दोलनमा सहादत्त प्राप्त गर्ने शहीदहरूप्रति आफूहरुको सम्मान छैन भन्ने अर्थमा प्रचार गरिराखिएको भन्दै लिङदेनले हामीले त्यो विषयप्रति अनादर नगरेको बताए ।
उनले उक्त घटनालाई लिएर प्रधानमन्त्रीले नै शहीदहरूप्रति अनादर गरेको भनेर गलत कुरा बाहिर लैजान नपाउने पनि बताए ।
