रौतहट । मधेश प्रदेशका मुख्यमन्त्री सरोज यादवले प्रहरी समायोजन गरिए २४ घण्टाभित्रै अपराध र भ्रष्टाचार नियन्त्रण गर्ने दावी गरेका छन् ।
नेपाल पत्रकार महासंघ, मधेश प्रदेश समितिले बुधबार रौतहटको चन्द्रनिगाहपुरमा आयोजना गरेको मधेश प्रदेश सञ्चार सम्मेलनको उद्घाटन गर्दै मुख्यमन्त्री यादवले उक्त दावी गरेका हुन् । ‘संघीय सरकारले कुनै हालतमा अपराध र भ्रष्टाचार नियन्त्रण गर्न सक्दैनन्’ यादवले भने, ‘प्रहरी र कर्मचारी समायोजन गरेपछि २४ घण्टामा नियन्त्रण गर्छु ।’
मुख्यमन्त्री यादवले अहिले प्रहरीबाट आफुले कुनै जानकारी समेत पाउन नसकिएको बताए । ‘मेरै गाउँ बारामा एउटा वेवारिसे शव फेला परेको थियो’ उनले भने, ‘प्रहरीबाट नभई स्थानीयबाटै यी जानकारी पाएँ ।’
पत्रकार अक्षय काेषमा १ करोड २५ लाख दिने
मुख्यमन्त्री यादवले प्रदेशमा पत्रकार अक्षय कोषमा १ करोड २५ लाख उपलब्ध गराउने प्रतिबद्धता गरे ।
उनले नेपाल पत्रकार महासंघ प्रदेश समितिको भवनका लागि जग्गा खोज्न आग्रह गरे । ‘जग्गा भेटिए भवन प्रदेश सरकारले निर्माण गरिदिन्छ’ उनले भने ।
