राजविराज । राजविराज नगरपालिकामा बितरित खानेपानीको समेत चोरी भइरहेको पाइएको छ ।
खानेपानी संस्थान, राजविराजले जिल्ला प्रशासन कार्यालयमा आईतबार आयोजना गरेको सरोकारबालासँगको बैठकमा यस्तो जानकारी गराइएको छ । बैठकले बितरण गरिएको धारामा चुहाबट र चोरी भइरहेकाले यसको अनुगमन गर्ने निर्णय गरेको छ । अनुगमन कार्यमा सबैको सहयोग रहने अपेक्षा गर्दै बैठकले अनुगमन अगाडि संचार माध्यममा संस्थानको नियमबारे सेवाग्राहीलाई जानकारी गराउने निर्णय गरेको छ ।
संस्थाको बाँकी बक्यौता असुल उपर गर्न राजविराज नगरपालिका लगायतको निकायले सेवाग्राहीहरुको कुनै पनि सिफारिस दिनु अगाडि खानेपानी भुक्तानी बिलको छायाप्रति माग गरेमा सेवाग्राहीहरुबाट स्वतस्फूर्त बाँकी बक्यौता असुल हुने सहज हुने देखिएकाले सो कार्यलाई प्राथमिकतामा राख्न अनुरोध गर्ने बैठकले निर्णय गरेको छ ।
राजविराज नगरपालिकाभित्र बितरण गरिएको खानेपानी प्रणाली धेरै पुरानो भई जिर्ण अवस्थामा रहेको हुँदा उक्त पाइप लाइनलाई नगरपालिका, भौतिक पूर्वाधार विकास कार्यालयसँग समन्वय गरी व्यवस्थित गर्ने निर्णय गरेको संस्थान प्रमुख राजाराम यादवले जानकारी दिए ।
उनका अनुसार राजविराज नपाभित्र नयाँ पाइपलाइन विस्तार गर्दा नगरपालिकासँग समन्वय गर्ने र अरु निकायहरुले सडक निर्माण कार्य गर्दा नेपाल खानेपानी संस्थानसँग समेत समन्वय गर्ने निर्णय बैठकले गरेको छ ।
बैठकले नेपाल सरकारको नीति अनुसार ‘एक घर, एक धारा’ अनुसार यस नगरपालिकामा स्यालो ट्युवेलको पानी पिउने योग्य नरहेको र खानेपानी संस्थानसँग पानी उत्पादनको समस्या नभएकाले सबै सरोकारबालाले ठोस नीति बनाई धारा बितरण कार्यलाई प्राथमिकतामा राखी काम गर्ने निर्णय पनि गरेको छ ।
यस्तै, पुरानो पाइपलाइन धेरैजसो कालोपत्रे, आरसीसी ढलानमा भएको हुँदा मर्मत कार्य गर्दा कामदारबाट सम्भव नभएको स्थानमा आवश्यक्ता अनुसार हेभी इक्वेपमेन्टको प्रयोग गर्नुपर्ने भएकोले यसमा राजविराज नपाले सहयोग गर्ने निर्णय गरेको छ ।
बैठकमा राजविराज नगरपालिकाका कावा प्रमुख इसरत परबिन, प्रमुख जिल्ला अधिकारी मेखबहादुर मंग्राती, जिल्ला प्रहरी प्रमुख बिभिन्न वडाका अध्यक्षसहित सरोकारबालाको उपस्थिति थियो ।
