राजविराज । राजविराजमा जगन्नाथ रथयात्रा २०८१ को आयोजना गरिने भएको छ ।
आगामी १३ पुस शनिबारका दिन राजविराजमा जगन्नाथ रथयात्रा निकालिने भएको हो ।
आयोजक श्री कृष्णभक्त मण्डल सप्तरी एवं इस्कान राजविराजले आज बिहान पत्रकार सम्मेलन गरी जगन्नाथ रथयात्राबारे जानकारी गराएको हो ।
रथयात्रा निकाल्नुअघि ५ पुसमा कलश यात्रा गर्दै कथा प्रारम्भ गरिनेछ । राजविराज ७ स्थित लक्ष्मीनारायण राधाकृष्ण मन्दिर हटियामा ५ देखि ११ गतेसम्म कथा जारी रहने आयोजक समितिका अध्यक्ष हितेश यादवले जानकारी दिए ।
कथा प्रत्येक दिन दिउँसो २ बजेबाट शुरु भई साँझ ६ बजेसम्म जारी रहनेछ । मथुराको श्रीबरसानाधामबाट रामानुज दासजीले कथा वाचन गर्नेछन् ।
अध्यक्ष यादवले स्थानीयका साथै देशको बिभिन्न ठाउँ एवं भारतबाट समेत कृष्णभक्तहरु रथयात्रामा सहभागिता जनाउने बताए । उनका अनुसार रथयात्रामा २० देखि २५ हजारको सहभागिता रहनेछ ।
