मधेश सम्वाददाता
राजविराज, ५ माघ ।
आज माघ ५ गते । मधेशमा आगो बलेको स्मरण गर्ने दिन । २०६३ साल माघ ५ गते सिरहाको लहानमा रमेश महतोको गोली लागी मृत्यु भएपछि मधेश आन्दोलन चर्किएको थियो । यस दिन बलिदानी दिवसको रुपमा मनाउँदै आएपनि यस पटक सप्तरीमा झारा टार्नेबाहेक कुनै कार्यक्रमको आयोजना गरिएन् ।
पहिलो मधेस आन्दोलन भएको १६ वर्षअघिको सम्झनामा यस वर्ष सप्तरीका मधेशवादी दलहरुले कुनै कार्यक्रमको आयोजना गरेको छैन् । दल निकटका युवाहरुले बिहीबार साँझ मैनबत्ति बाल्नुबाहेक दलका नेताहरुले शहीदलाई सम्झिएनन् । पार्टीका युवा तथा विद्यार्थीहरुले राजविराजमा मैनबत्ति बालेर शहीहरुको स्मरण गरेका छन् । जसपा, जनमत लगायतका पार्टीका युवा, विद्यार्थीले स्थानीय गजेन्द्र र जनआन्दोलन चोकमा मैनबत्ति बालेका छन् ।
लोकतान्त्रिक समाजवादी पार्टी (लोसपा) का नेताहरु गजेन्द्रनारायण सिंहको शालिकमा माल्र्यापण गरेका छन् । उनीहरुले मैनबत्ति समेत प्रज्जवलन गरे ।
मधेस र मधेसी जनताकै नाममा राजनीति गरिरहेको राजनीतिक दलहरुले बलिदानी दिवसलाइ लक्षित गरी सप्तरीमा कुनै कार्यक्रम नै निर्धारण गरेनन् । पार्टीका नेताहरुलाई मधेशी शहीद र उनीहरुको बलिदानलाई सम्झिन कुनै चासो र फुर्सद नभएको देखिन्छ ।
केहि मधेशवादी दलका नेताहरुले सिरहाको लहानस्थित शहीद रमेश महतोको शालिकमा माल्र्यापण गरेका छन् ।
२०६३ साल माघ २ गते फोरम नेपाल अध्यक्ष उपेन्द्र यादवसहितका व्यक्तिले काठमाडौंको माइतीघर मण्डलामा अन्तरिम संविधान जलाएको आरोपमा उनीलगायतका २८ जनालाई प्रहरीले पक्राउ गरेको थियो ।
पक्राउको विरोधमा बन्दहड्तालसहितका आन्दोलनका कार्यक्रम मधेसमा सुरु भएको थियो । त्यसै क्रममा एक माओवादी कार्यकर्ताको गोलीबाट माघ ५ गते लहानमा रमेश महतोको मृत्यु भएपछि आन्दोलनले विद्रोहको रुप लिएको थियो ।
यो दिनलाई मधेश सरकारले बलिदानी दिवसको रुपमा मनाउँदै आएपनि यस बर्ष मधेश सरकारले पनि कुनै कार्यक्रमको आयोजना गरेन् ।
