राजविराज । मुलुककै पुरानोमध्येका एक राजविराज नगरपालिकाको विकासका लागि मास्टर प्लान बनाएर अघि बढ्नुपर्नेमा जोड् दिइएको छ ।
नगरपालिकाका कार्यबाहक मेयरसहित सबै वडाका अध्यक्षहरुसँगको बैठकमा प्रदेश सभा सदस्य महेश प्रसाद यादवले बिना योजना नगरको विकास हुन नसक्ने बताए ।
यादवले नगरपालिका क्षेत्रभित्रका समस्याहरुको उचित पहिचान गरी त्यसलाइ सामाधान गर्न हरेक तवरबाट पहल गर्न आग्रह गरे । उनले जनताको मूलभूत कुरा शिक्षा, स्वास्थ्य क्षेत्रमा भएको समस्याहरुप्रति गम्भीर रहन नगरपालिकाका जनप्रतिनिधीसँग आग्रह गरे । उनले प्रदेश स्तरबाट आफूले सक्ने हरेक किसिमको सहयोग गर्ने प्रतिबद्धता जनाए ।
प्रदेश सभा सदस्य यादवले विकासीय कार्य तथा योजनाहरु साना–साना रुपमा वडास्तरबाट संचालन भइ नै रहेकाले नगर क्षेत्रलाइ सोन्दर्यीकरण गर्न र सम्पूर्ण वडालाई एक साथ विकासको बाटो तर्फ डोर्याउन एउटा मास्टर प्लानको तहत काम गर्नुपर्ने बताए । ‘यस किसिमको बृहत् मास्टर प्लान जसरी भए पनि नगरपालिका क्षेत्रभित्र लागू गर्नु जरुरी छ’ उनले भने, ‘प्रदेशस्तरबाट राम्रो सहयोग गर्न हामी तयार छौं ।’
बैठकमा राजविराज नगरपालिकाका कार्यवाहक प्रमुख इसरत परबिन, योजना शाखा प्रमुख, सम्पुर्ण १६ वडाका वडा अध्यक्षहरुको उपस्थिति थियो ।
