मधेश सम्वाददाता
राजविराज, ५ माघ ।
बिहीबार प्रतिनिधीसभामा सभामुख चयनका निम्ति निर्वाचन थियो । निर्वाचनअघि सांसदहरुले बोलिरहेका थिए । त्यहीं क्रममा बोल्ने पालो आयो जनमत पार्टीका अध्यक्ष डा. सिके राउतको । उनले शुरुमा आफ्ना धारणाहरु राखे । त्यसपछि उनले मधेश आन्दोलनका क्रममा शहादत दिएकाहरुलाई स्मरण गरे ।
बिहीबार माघ ५ गते थियो । यो दिनलाई मधेशमा बलिदानी दिवसको रुपमा मनाउँदै आइएको छ । सप्तरी क्षेत्र नम्बर २ बाट प्रतिनिधी सभामा निर्वाचित डा. राउतले माघ ५ गतेको स्मरण गर्दै एक मिनेट मौन धारण गर्न शुरु गरे । त्यस क्रममा उनले मौन धारणमा सहभागी भइदिन सांसदहरुसँग आग्रह पनि गरे ।
उनले यसो भन्दै गर्दा केहि सांसदहरु तत्कालै उठे । केहि सांसद पनि विस्तारै उठे । शहीदहरुलाई स्मरण गर्दै गरिएको मौन धारणमा प्रधानमन्त्री पुष्पकमल दाहाल ‘प्रचण्ड’ नै उठेनन् । गृह मन्त्री रबी लामिछाने भने उठेर मौन धारणमा सहभागिता जनाएका थिए ।
डा. राउतले संसदमा शहीदलाई स्मरण गर्दै मौन धारण गरेको र गराएकोमा उनको बाहवाही भइरहेको छ । डा. राउतले राम्रो काम गरेको भन्दै सामाजिक संजालमा प्रशंसा भइरहेको छ । तर, प्रधानमन्त्री दाहालसहित मौनधारणमा सहभागी नभएका सांसदहरुप्रति आक्रोश व्यक्त भइरहेको छ ।
मौनधारण गर्नुअघि डा. राउतले पदका लागि मात्रै राष्ट्रिय सहमति गर्न खोजिएको आरोप लगाए । उनले मधेशी दललाई पाखा लगाएर राष्ट्रिय सहमति हुन नसक्ने बताए ।
