राजविराज । मधेश प्रदेशका शिक्षा, विज्ञान, प्रविधि तथा बाणिज्य मन्त्री महेश प्रसाद यादवले सरकारले अत्यधिक लगानी गरिरहेको सामुदायिक विद्यालयको अवस्था लथालिङ रहेको बताएका छन् । उनले सरकारको लगानी भएको ठाउँमा शैक्षिक गुणस्तर राम्रो हुनुपर्नेमा नभएको बताए ।
राजविराजस्थित आधारभूत विद्यालय थानगाछीको स्वर्ण जयन्तीको अवसरमा बिहीबार आयोजना गरिएको कार्यक्रमको उद्घाटन गर्दै मन्त्री यादवले सामुदायिक विद्यालयको अवस्थालाई सुधार्न प्रदेश सरकारले नीति बनाउन लागेको जानकारी गराए ।
सामुदायिक विद्यालयको शैक्षिक गुणस्तरलाई राम्रो बनाउन अभिभावकले पनि भूमिका खेल्नुपर्ने उनले बताए । उनले विद्यालयमा आफ्ना बच्चाहरु पढिरहेका छन् कि छैनन् ?, शिक्षकले पढाइरहेका छन् कि छैनन् भनेर ध्यान दिनुपर्ने बताए ।
विद्यालयहरुमा देखिएको समस्यालाई प्रदेश सरकारले गम्भीर रुपमा लिएको भन्दै मन्त्री यादवले यसमा सुधारका निम्ति सबैले सहयोग गर्नुपर्ने बताए ।
उनले सप्तरीसहित मधेश प्रदेशका आठ वटै जिल्ला शिक्षामा पछि पर्दै गएको बताउँदै प्रदेश सरकारलाई प्रदेशलाई पूर्ण साक्षर बनाउन अभियान नै संचालन गर्ने बताए ।
कार्यक्रममा राजविराज नगरपालिकाका कार्यवाहक प्रमुख इसरत परबिनले शिक्षामा गुणस्तरियता बिना समाजको विकास असम्भव भएकाले यसमा ध्यान दिन सबैसँग आग्रह गरिन् ।
विद्यालय व्यवस्थापन समितिका अध्यक्ष श्याम नारायण चौधरीको अध्यक्षतामा आयोजित कार्यक्रममा पूर्व प्रदेश सांसद नेत्रबिक्रम साह, राजविराज नगरपालिका वडा नम्बर ६ का वडाअध्यक्ष शशि चौधरी, शिक्षक अभिभावक संघका राधेश्याम साह, पूर्व शिक्षक सुरेन्द्र चौधरी, स्थानीय सत्रुधन साह, शिक्षक फुलचन्द्र साह, एन प्याब्सन सप्तरीका अध्यक्ष नरेशप्रताप साह, राजविराज नगरपालिकाका निमित प्रमुख प्रशासकीय अधिकृत निरन्जन कुमार यादवसहितकाले बोलेका थिए ।
