सप्तरीमा एक युवाको हत्या भएको छ । जिल्लाको खडक नगरपालिका वडा नम्बर ४ पन्सेरा निवासी सन्टु कुमार पासवानको स्थानीय केहि युवाले कुटपिट गर्दै हत्या गरेका हुन् ।
डिजे बनाउने विषयमा झडप हुँदा २७ बर्षीय सन्तलाल पासवानको उपचारको क्रममा बुधवार बिहान मृत्यु भएको हो ।
स्थानीय रामचन्द्र पासवानको धरमा सोमबार राति जन्ती आएको र सो संगै ल्याएको डिजे बजाउने विषयमा चर्किएको विवाद झडपमा परिणत भएपछि एक समूहको कुटपिटबाट पासवानको मृत्यु भएको प्रहरीले जनाएको छ ।
कुटपिटबाट घाइते भएका उनलाई उपचारका लागि विराटनगर स्थित नोवेल मेडिकल कलेज लगिएको र उपचारको क्रममा मृत्यू भएको जिल्ला प्रहरी कार्यालय सप्तरीले जनाएको छ ।
युवकको मृत्यु भएपछि दोषीलाई कारबाहीको माग गर्दै स्थानीय बासिन्दाहरूले सप्तरीस्थित पूर्व–पश्चिम राजमार्गको कल्याणपुर–कडरबोना खण्डमा बिहान १० बजेदेखि सडक अवरुद्ध पारेका छन् ।
यता जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक माधवप्रसाद काफ्लेले कुटपिटमा संलग्न भएको आरोपमा एक जनालाई नियन्त्रणमा लिएको र घटनाबारे थप अनुसन्धान भइरहेको जानकारी दिए ।
