राजविराज । बोदे बर्साइन नगरपालिकाले एक बर्षमा रु ३० लाखभन्दा बढीको इन्धन खर्च गरेको छ भने एक बर्षमा गाडी भाडा वापत रु १३ लाख खर्च गरेको छ । यस्तै मर्मतमा रु २९ लाखभन्दा बढी खर्च गरेको छ ।
महालेखा परीक्षकको कार्यालयले सार्वजनिक गरेको २०७७÷७८ को प्रतिवेदनमा उक्त तथ्य उल्लेख गरिएको छ । प्रतिवेदनमा पदाधिकारीले रु ५ लाख ९७ हजार ९३६ र कार्यालय प्रयोजनका लागि रु २५ लाख २५ हजार २४२ इन्धनमा खर्च गरेको छ ।
इन्धन खर्च गर्दा मापदण्ड तयार नगरेको सबारी साधन अनुसार बार्षिक इन्धन खर्च र उपयोगको विवरण खुल्ने गरी अभिलेख नराखेको देखिएको छ । इन्धनको बिल संलग्न गरेपनि के–कति इन्धन कुन मतिमा कुन सबारीसाधनमा प्रयोग भएको कुपन संलग्न भएको छैन् । ‘कर्मचारीले प्रयोग गरेको कार्यालयको नीजि सबारीसाधनमा समेत इन्धन प्रयोग गरेको देखिएकोमा पालिकाबाट यस्तो सुविधा उपलब्ध गराइने सम्बन्धमा कुनै निर्णय भएको नदेखिएको यसरी प्रयोग भएको इन्धनलाई नियमित मान्न सकिएन इन्धन खर्चलाई मितव्ययी बनाउन कोटा निर्धारण गरी लगबुक राखेर मात्र खर्च लेख्नेतर्फ कार्यालयको ध्यान जानुपर्ने देखिन्छ’ प्रतिवेदनमा भनिएको छ ।
यो बर्ष बोदे बर्साइन नगरपालिकाले कार्यालयको दैनिक कामकार्वाहीको लागि तथा पदाधिकारीको निमित्त समेत बिभिन्न समयमा सबारीसाधन भाडामा लिए वापत रु १३ लाख खर्च गरेको छ । सबारीसाधनको दर निर्धारण तथा छनौटको आधार र कतिपयमा प्रयोजन पनि खुल्न सकेको छैन् । सम्झौता बमोजिमको सबारीसाधन स्वामित्व भएकोलाई भुक्तानी गर्नुपर्नेमा अन्य व्यक्तिलाई समेत भुक्तानी गरेको देखिन्छ । कार्यालयको कामको प्रकृति र कार्य व्यस्तताको दृष्टिकोणले कार्यालय प्रयोजनका लागि भाडाको सबारीसाधन प्रयोग पर्दा प्रचलित कानुनले तोकेको प्रकृया अबलम्बन गरी मितव्ययी तथा किफायती एवं कार्य प्रकृति अनुकुल हुने गरी भाडामा लिन सुझाव दिएको छ ।
यो नगरपालिकाले सबारी साधन मर्मतमा एक बर्षमा रु १० लाख भन्दा बढी रकम खर्च गरेको छ । नगरपालिकाले मर्मत खर्च भुक्तानी गर्दा अधिकांस खर्चमा मर्मत आदेश र मर्मत अभिलेख तयार नगरी सबारीसाधनमा रु १० लाख ५३ हजार ८४० र सार्वजनिक सम्पत्तिको मर्मत सम्भारमा रु १९ लाख १२ हजार ६०९ खर्च गरेको प्रतिवेदनमा उल्लेख छ । कतिपय मर्मत कार्य लागत अनुमान तयार नगरी टुक्रा पारी समेत गरेको देखिन्छ भने मर्मतको बिलहरुको गाडी नम्बर समेत उल्लेख नरहेको प्रतिवेदनमा भनिएको छ ।
