राजविराज । अहिलेका जनप्रतिनिधी शौखिन बन्दै गएका छन् । उनीहरुलाई या त सबारी साधन चाहियो या त यातायात सुविधा । यी दुई सुविधामध्ये एक सुविधा जनप्रतिनिधीले उपभोग गर्दै आएका छन् । तर, सप्तरीको एक पालिकाका जनप्रतिनिधीले भने यी दुबै सुविधा प्रयोग गरेको खुलेको छ ।
जिल्लाको बोदे बर्साइन नगरपालिकाका वडाअध्यक्षहरुले मोटरसाइकल त पाए नै यातायात सुविधा समेत लिएका छन् । यो नगरपालिकाका १० वडाका अध्यक्षले यातायात सुविधा पाए । तर पुनः ९ जना वडा अध्यक्षलाई कार्यालयले मोटरसाइकल उपलब्ध गराएको छ ।
महालेखापरीक्षकको कार्यालयले सार्वजनिक गरेको आफ्नो प्रतिवेदनमा यहाँका वडाअध्यक्षले दोहोरो सुविधा लिएको उल्लेख छ । ‘९ जना वडाअध्यक्षलाई सबारीसाधन मासिक सुविधा वापत रकम भुक्तानी गरेकोमा अलग्गै बाइक समेत प्रयोगको निमित्त उपलब्ध गराएको पाइयो’ प्रतिवेदनमा भनिएको छ, ‘सम्बपन्धित वडा अध्यक्षले बाइक पयोग नगरेको भए प्रमाण पेश हुनुपर्ने अन्यथा मासिक सुविधा वापतको रकम उनीहरुबाट असुली गरिनुपर्छ ।’
महालेखाले ९ जना वडा अध्यक्षबाट रु ९ लाख असुली गर्न भनेको छ ।
