राजविराज । मिथिला क्षेत्रमा डिहबार मन्दिरको ठूलो महत्व छ । यहाँ कुनै पनि धार्मिक गतिविधी या पूजापाठ डिहबारलाई बाहिर राखेर अपूरो रहन्छ । हरेक गाउँमा डिहबारको पूजापाठ गर्ने गरिन्छ ।
डिहबारको महत्वलाई उजागर गर्दै सप्तरीका युवक सुरेश मुखियाले एउटा बृत्तचित्र बनाएका छन् । जुन भिडियो ‘मेरो गाउँ, मेरो ठाउँ’ भिडियो च्यालेन्ज २०२३ का लागि मनोनयनमा परेको छ । वि विल राइज फाउण्डेसनले आह्वान गरेको राष्ट्रव्यापी वृत्तचित्र प्रतियोगिता ‘मेरो गाउँ, मेरो ठाउँका लागि मुखियाले डिहबार सम्बन्धी वृत्तचित्र बनाएका छन् ।
आयोजकले आह्वान गरेको १० विधामध्ये मुखियाको वृत्तचित्र ३ विधामा पर्न सफल भएको छ । बेस्ट स्टोरी, कन्सेप्ट डाइरेक्सन र वेस्ट फ्यूचर स्टार विधामा यो वृत्तचित्र परेको छ ।
आयोजकले वेस्ट भिडियो अफ द इयर, जजेज च्वोइस अवार्ड, स्टोरी कन्सेप्ट÷वेस्ट डिरेक्सन, वुनम भिडियो मेकर अफ दि इयर, फ्युचर स्टार अफ दि इयर, मोष्ट पोटेन्सियल डेस्टिनेसन, मोष्ट एर्नजेटिक भिडियो मेकर, वेष्ट स्क्रिप्ट÷भ्वाईस ओभर, वेस्ट सिनेमाटोग्राफर र बेष्ट एडिटर गरी विभिन्न दश विधामा मनोनयन गरेको हो । प्रत्येक विधामा सात–सात वटा भिडियो मनोनयन गरिएको छ ।
निर्देशक भुषण दाहाल, अभिनेत्री करिश्मा मानन्धर, प्रेस काउन्सिल नेपालका अध्यक्ष बालकृष्ण बस्नेत, निर्देशक तथा सिनेमाटोग्राफर सबनम मुखिया, नेपाल पर्यटन बोर्डकी म्यानेजर अर्चना केसी राना, नेपाल उद्योग परिसंघका महाप्रबन्धक दीपकराज जोशी (टुरिजम बोर्डका पूर्व सिईओ) र वि विल राइज फाउण्डेसनका निर्देशक निर्मल श्रेष्ठ सहभागी निर्णायक टोलीले देशैभरबाट पठाइएका कुल २५८ मध्येबाट ७० वृत्तचित्रलाई मनोनयनमा पारेका हुन् ।
उत्कृष्ट भिडियोहरू मध्ये बेष्ट भिडियो अफ द इयरले पाँच लाख रुपैयाँ, जजेज च्वोइस अवार्डले दुई लाख र बाँकी सबै विधामा एक–एक लाख रुपैयाँ नगदसहित ‘मेरो गाउँ, मेरो ठाउँ भिडियो च्यालेञ्ज २०२३’ अवार्ड प्रदान गरिने आयोजकले जनाएको छ ।
प्रतियोगिताको ग्राण्ड फिनाले वि विल राइज फाउन्डेसन र नेपाल टेलिभिजनको सयुंक्त आयोजनामा जेठ १३ गते साँझ राष्ट्रिय सभागृह, काठमाडौँमा हुनेछ । कार्यक्रम नेपाल टेलिभिजनबाट प्रत्यक्ष प्रसारण गरिने आयोजकले जनाएको छ । कार्यक्रममा नेपाल पर्यटन बोर्ड र चलचित्र विकास बोर्डको समेत साथ रहेको छ ।
