सर्लाहीमा एक युवकको हत्या भएको छ । जिल्लाको हरिपुर नगरपालिका वडा नम्बर १, स्थित मुक्तेश्वर सामुदायिक वनमा शनिबार धारिलो हतियार प्रहार ती युवकको हत्या गरेको पाइएको प्रहरीले जनाएको छ ।
मुक्तेश्वर सामुदायिक वन क्षेत्रभित्र पर्ने बागमती सिँचाईको नहरमा रौतहटको गुजरा नगरपालिका ५ बस्ने अन्दाजी ३१ वर्षीय विष्णुसिंह घिसिङको हत्या भएको हो । घिसिङको घाँटीमा धारिलो हतियार प्रहार गरी हत्या गरिएको अवस्थामा शव फेला परेको सर्लाही प्रहरीका प्रवक्ता डीएसपी माधव प्रसाद बुढथोकीले जानकारी दिए ।
मृतकको शवलाई पोष्टमार्टमका लागि प्रादेशिक अस्पताल मलंगवा पठाइएको छ । घिसिङ रौतहटबाट मूर्तियास्थित आफन्तको घरमा आएको भन्ने खुलेपनि विस्तृत विवरण खुल्न बाँकी रहेको प्रहरीले बताएको छ ।
घटनाको अनुसन्धान र अपराधमा संलग्नहरुको खोजी गर्न इलाका प्रहरी कार्यालय बरहथवाबाट डीएसपी उमाशंकर प्रसाद यादव नेतृत्वको प्रहरी टोली परिचालन भइसकेको छ ।
