राजविराज । मिटरव्याज पीडित अझै पीडित बन्न थालेका छन् । मुद्दा मिलाइदिने नाममा पीडितका अगुवा भनाउँदाहरुले पीडितसँग् रकम असुल्न थालेको खुलेको छ ।
मिटर व्याज पीडित संघर्ष समितिका सचिव रहेका छेदी पासवानले पीडितसँग रकम असुलेका हुन् । पीडितमध्येकी शम्भुनाथ नगरपालिका वडा नम्बर ६ निवासी सदिना खातुनले आफ्नो मुद्दा चाँडै टुँग्याइदिने नाममा पासवानले पटक–पटक गरी रु २० हजार लिएको बताइन् ।
बुधबार राजविराजमा पत्रकारसँग कुरा गर्दै खातुनले आफूले गाउँकै गोपाल प्रसाद साहसँग जग्गा धितो राखी टेलर्स खोल्न रु २ लाख ऋण लिँदा रु ५ लाख दिइसक्दा समेत साहले आफ्नो जग्गा बेचिदिएपछि समस्या परेको बताइन् । यसबारेमा जिल्ला प्रशासन कार्यालयको मिटर व्याज कक्षमा निवेदन दिँदा प्रहरीले साहलाई बोलाएर केहि नगरी छाडिदिएको बताइन् ।
यसपछि मिटरव्याज पीडित संघर्ष समितिका सचिव पासवानले मुद्दा टुँग्याइदिने नाममा २ पटक ५÷५ हजारका दरले र एक पटक रु १० हजार लिएको बताइन् ।
मिटरव्याज पीडितहरुले आफूहरुका नेता भनाउँदाहरु धनीकै वरिपरी देखिन थालेको बताए । ‘अहिले हाम्रा नेताहरु पीडितको पक्षमा बोल्दैनन्’ बुधबार नेपाल पत्रकार महासंघ, सप्तरीमा पत्रकार सम्मेलन गरी पीडित प्रमोद साहले भने, ‘धनीकै पक्षमा बोल्न थालेका छन् ।’
उनले छेदी पासवान धनीकै कुरा बोल्न थालेको बताए ।
पीडितहरुले प्रशासन कार्यालयले पीडितको कुरा नमानी साहमु महाजनकै कुरा बढी सुन्न थालेको बताए । उनीहरुले आफूहरुले न्याय नपाए चरणबद्ध आन्दोलन शुरु गर्ने बताए ।
