राजविराज । अस्पताल विकास समिति कर्मचारी युनियन गजेन्द्रनाराण सिंह अस्पताल ईकाई समितिको चौथो अधिवेशन शनिबार राजविराजमा सम्पन्न भएको छ ।
अधिवेशनको उद्घाटन गर्दै जिल्ला सम्वन्वय समिति सप्तरीका प्रमुख शिवनाराण साहले अस्पताल विकास समिति अन्तर्गत कार्यरत कर्मचारीले पाउनुपर्ने जति तलब नपाएकै कारण अस्पतालको अवस्था बिग्रदै गएको बताए ।
नेपाल सरकारले तोकेको न्यूनतम तलव पनि कर्मचारीले नपाउँदा काम गर्ने उत्साहमा कमी आएकाले झनै अस्पतालको अवस्था विग्रदै गएको उनले तर्क गरे । ‘जस्तो कर्मचारीको अवस्था छ, त्यस्तै अस्पतालको पनि अवस्था छ’ साहले भने ।
अस्पताल इकाई समितिका अध्यक्ष मनोज देवको अध्यक्षतामा आयोजित उद्घाटन सत्रमा अस्पताल विकास समितिका केन्द्रिय महासचिव नवराज लुईटेलले आन्तरिक प्रतिस्पर्धाबाट हाल अस्पताल विकास समिति अन्तर्गत कार्यरत कर्मचारीलाई स्थायी गर्नुपर्ने माग गरे । ‘निराश नहुनुस तर खवरदारी गर्नुस्’ उनले भने ।
अस्पतालका निमित्त मेडिकल सुपरिडेन्टेन्ट दिलिप साहले आर्थिक अवस्थामा सुधार आएपछि कर्मचारीको तलव वृद्धि गर्ने प्रतिवद्धता जनाए ।
कार्यक्रममा गोरखापत्र दैनिकका मधेश प्रदेश समितिका व्यूरो प्रमुख धीरेन्द्र प्रसाद साह, नेपाल प्रेस युनियन सप्तरीका अध्यक्ष विनय कुमार लाल कर्ण, निजामति कर्मचारीहरुको आधिकारिक ट्रेड युनियन सप्तरीका अध्यक्ष अजय कुमार झासहितकाले श्रमिक ऐन अन्तर्गत कर्मचारीहरुलाई तलव दिनुपर्नेमा जोड दिए ।
