राजविराज । सप्तरी सदरमुकाम राजविराजमा आइतबारदेखि ‘सप्तरी सांस्कृतिक, पर्यटन, कृषि, व्यापारिक महोत्सव’ शुरू भएको छ ।
दुई सातासम्म चल्ने महाेत्सवमा बाल उधान सम्बन्धी विभिन्न स्टल, खानेकुराको स्टलसहित सांस्कृतिक कार्यक्रमको आयोजना गरिनेछ ।
सप्तरी युथ नेपालले आयोजना गरेको महोत्सवको एक कार्यक्रमकाबीच राजविराज नगरपालिकाका कार्यवाहक प्रमुख इसरत परबिनले उद्घाटन गरिन । त्यस अवसरमा बोल्दै उनले यो महोत्सव सप्तरीको बासिन्दाकै महोत्सव भएकाले सबैले सफलतापुर्वक सम्पन्न गराउनुपर्ने बताइन् ।
उनले महोत्सवमा गर्नुपर्ने हरेक सहयोग गर्न तयार रहेको बताइन् ।
छिन्नमस्ता गाउँपालिकाका अध्यक्ष बिद्यानन्द चौधरीले महोत्सव सफल बनाउने जिम्मेवारी सबै सप्तरीबासीको भएको बताए । उनले युवाले यस्तै किसिमका कार्यक्रमसहित सप्तरीको विकासका लागि अग्रसर हुनुपर्ने बताए ।
रुपनी गाउँपालिकाका अध्यक्ष दिनेश यादवले सप्तरीका युवालाई सकारात्मक कामका लागि अग्रसर हुनुपर्ने बताए ।
