राजविराज । खाद्य अधिकार तथा खाद्य प्रणाली रणनीतिक योजना तर्जुमा सम्बन्धी तीन दिने तालिम सप्तरीको हनुमाननगर कंकालिनी नगरपालिकामा शुरु भएको छ ।
विश्व खाद्य कार्यक्रम (डब्ल्यूएफपी) को प्राविधिक सहयोगमा राष्ट्रिय योजना आयोग र हनुमाननगर कंकालिनी नगरपालिकाको संयुक्त आयोजनामा मंगलबारदेखि यो तीन दिने तालिमको आयोजना गरिएको हो ।
तालिमको एक कार्यक्रमकाबीच राष्ट्रिय योजना आयोगका सदस्य डा. जयकान्त राउतले उद्घाटन गरे । त्यस अवसरमा बोल्दै उनले देशमा खाद्य संकट आइसकेकाले यसको निराकरणका लागि योजना आयोगले नै रोडम्याप बनाएर यो कार्यक्रम ल्याएको बताए ।
उनले सातै प्रदेशको एक÷एक पालिकामा अहिले यो कार्यक्रम ल्याइएको बताउँदै पछि सबै प्रदेशमा विस्तार गरिने बताए । मधेश प्रदेशमा हनुमाननगर कंकालिनी नगरपालिकामा यो कार्यक्रम आएको छ’ उनले भने, ‘खाद्य संकटको निराकरणका लागि योजना बनाएर कार्यान्वयन गरिनेछ ।’
कार्यक्रममा प्रदेश सभा सदस्य सकील अलीले बर्तमान समयमा खेतीतर्फ युवाको आकर्षण घट्दै गएका कारण खाद्य संकट आएको चर्चा गर्दै अन्न उत्पादनमा राज्यले गम्भीर तरिकाले ध्यान दिई युवाहरुलाई प्रोत्साहित गर्नुपर्ने बताए ।
नगरपालिकाका प्रमुख बिरेन्द्र माझीको अध्यक्षतामा भएको कार्यक्रममा उप प्रमुख सरिता सिपलिया यादव, नेपाल पत्रकार महासंघ, सप्तरीका अध्यक्ष श्रवणकुमार देवसहितकाले मन्तव्य व्यक्त गरेका थिए ।
कार्यक्रमको उद्देश्यबारे जानकारी गराउँदै नगरपालिकाका प्रमुख प्रशासकीय अधिकृत हरिमोहन सुतिहारले स्वागत मन्तव्य व्यक्त गरेका थिए ।
तालिममा राष्ट्रिय योजना आयोगबाट आएकाचन्द्र थापा, महेश खरेल र पुष्प श्रेष्ठले तालिम दिने नगरपालिकाका सूचना अधिकारी अमित पाठकले जानकारी दिए ।
उनका अनुसार खाद्य अधिकार र खाद्य प्रणालीबारे तालिमपछि योजना बनाइनेछ ।
तालिममा नगरपालिकाका जनप्रतिनिधीसहित कर्मचारी, किसानको सहभागिता रहेको छ ।
