राजविराज । राजविराज नगरपालिकाका कार्यबाहक मेयर इसरत परबिनले सप्तरी युथ नेपालले रामराजा स्वास्थ्य विज्ञान प्रतिष्ठान निर्मणका लागि थालेको आन्दोलनप्रति ऐक्यबद्धता जनाएकी छन् ।
युथ नेपालले प्रतिष्ठान निर्माणको माग गर्दै अर्काे चरणको आन्दोलन अन्तर्गत बुधबारदेखि हस्ताक्षर अभियान शुरु गरेको छ । बिहीबार हस्ताक्षर गर्दै कार्यबाहक मेयर परबिनले युवाहरुको आन्दोलनमा आफ्नो समर्थन रहेको बताइन् ।
सप्तरी युथ नेपालले गरिरहेको गतिविधी जिल्लाको विकासका निम्ति राम्रो रहेको भन्दै उनले आफू पनि युवाहरुको साथमा रहेको उल्लेख गरिन् ।
संघीय सरकारले घोषणा गरेर तत्कालिन प्रधानमन्त्रीले शिलान्यास समेत गरिसकेको प्रतिष्ठान निर्मण गर्न नचाहनु दुःखद रहेको भन्दै उनले अबिलम्ब काम अघि बढाउन सरकारसँग आग्रह गरिन् ।
पहिलो चरणमा बिभिन्न आन्दोलन गरिसकेको सप्तरी युथ नेपालले प्रतिष्ठान निर्माणका लागि हस्ताक्षर अभियान शुरु गरेको छ । हस्ताक्षर अभियानपछि आन्दोलनको अर्काे चरण घोषणा हुने सप्तरी युथ आन्दोलन परिचालन समितिमा संयोजक सत्येन्द्र यादवले बताए ।
