राजविराज । भारतकाे अयाेध्यामा भगवान रामकाे प्राण प्रतिष्ठा भएको अवसरमा सप्तरीमा भव्य पूजापाठ गरिएको छ । आ-आफ्ना घर एवं आसपासका क्षेत्र सिंगारेर पूजापाठ गरिएको छ । अधिकांस ठाउँमा भजन, किर्तन, रामायण पाठको आयोजना गरिएको छ ।
सदरमुकाम राजविराजको ठाउँ-ठाउँमा दीप बालिएको छ । स्थानीय राज रंगशालामा सप्तरी युथ नेपालका युवाले ११ हजार दीप बालेर जय श्रीराम लेखेका छन् । यहाँ हवन, किर्तन, भजन समेत गरिएको छ ।
राजविराजमा अर्को युवाद्वारा झाकीसहितको भव्य र्याली निकालिएको छ ।
स्थानीय गजेन्द्र चोकमा युवाले चारैतिर दीप बाल्दै जय श्रीरामको नारा घन्काएका छन् ।
राजविराजको चारैतिर दीप बाल्दा दिपावली मनाइएको झल्को देखियो ।
सोमबार बिहानैदेखि जिल्लाको मन्दिर र शक्तिपिठमा श्रद्धालुको घुइँचो थियो । यहाँका बासिन्दाले सोमबार उल्लासमय वातावरणमा रमाएका छन् ।
सोमबारका लागि सप्तरीको सवै पालिकाले दीप उत्सव मनाउन र माछा मासु तथा रक्सीको बिक्री वितरणमा प्रतिबन्ध लगाएको थियो । केही पालिकाले विदा नै दिएको थियो ।
