राजविराज । जनमत पार्टीले राजविराजस्थित कृषि विश्वविद्यालयमा लगाएको ताला खुलेको छ ।
बिहीबार सर्वदलीय, सर्वपक्षीय बैठकले सहमति भएसँगै ताला खुलेको हाे ।
बैठकले कृषि विश्वविद्यालयले आफ्नो कमीकमजोरी महसुस गरि सबै दल र प्रशासनसँग समन्वय र सहकार्य गर्ने निर्णय गरेको छ ।
जनमत पार्टीले उठाएका सवालहरुको सन्दर्भमा एक महिनाभित्र प्रतिवेदन सार्वजनिक गर्ने निर्णय पनि भएको छ ।
यस्तै बैठकले विश्वविद्यालयको भवन शिलान्यासका क्रममा समन्वयको अभावमा घटना भएको ठहर गर्दै दुख ब्यक्त गरिएको छ ।
सहकुलपतिलाई कुनै जानकारी नै नदिई कामकाज अगाडि बढाएको भन्दै जनमत पार्टीका नेता/कार्यकर्ताले राजविराजस्थित मधेश कृषि विश्वविद्यालयको कार्यालयमा गत माघ ७ गते ताला लगाएको थियो ।
विश्वविद्यालयको सहकुलपति मधेश प्रदेशह सरकारका शिक्षा तथा संस्कृति मन्त्री महेश यादव भएपनि उनलाई कुनै जानकारी नै नदिई कामकाज अगाडि बढाएको भन्दै जनमतका नेता/कार्यकर्ताले ताला लगाएका थिए ।
बिना निर्णय कृषि विश्वविद्यालयको भवन शिलान्यासका लागि जसपा अध्यक्ष उपेन्द्र यादवलाई बोलाएपछि जनमत पार्टीले आक्रोश व्यक्त गरेको हो । उसले प्रदेश सरकारका प्रतिनिधि ले शिलान्यास गर्नुपर्ने जोड दिदै आएको थियो ।
