राजविराज । क्यानाडाबिरुद्धको पहिलो एकदिवसीय खेलमा नेपाल विजयी भएको छ ।
किर्तिपुर क्रिकेट मैदानमा बिहीबार भएको पहिलो खेलमा नेपालले क्यानाडालाई ७ रनले पराजित गरेको हो ।
नेपालले दिएको २२५ रनको लक्ष्य पूरा गर्ने क्रममा क्यानाडा टिम ४७ ओभर ५ बलमा अलआउट हुँदै २१७ रन मात्रै बनाउन सक्यो । उसका लागि दुई खेलाडीले अर्धशतकीय पाली खेलेपनि टिमलाई जिताउन सकेनन् । निश्चलस किर्टाेन ६८ र परगत सिंहले ५० रनको योगदान दिए । हर्ष ठाकेरले ३२ रन बनाउँदा आरुन जोनसनले २० रनको योगदान दिए ।
नेपालका लागि कप्तान रोहित पौडेलले ४ विकेट लिए भने ललित राजबंशीले २ विकेट हात पारे । सोमपाल कामी, रिजन ढकाल, पवन सर्राफ र कुशल मल्लले १÷१ विकेट लिए ।
यसअघि टस जितेर पहिले व्याटिङ गरेको नेपाल निर्धारित ५० ओभरमा अलआउट हुँदै २२४ रन बनाएको थियो । नेपालका लागि कुशल भुर्तेलले सर्वाधिक ६२ रन बनाए भने आरिफ शेखले ३८ रनको योगदान दिए । सोमपाल कामी २७, कुशल मल्ल २०, भीम सार्की १७ र पवन सर्राफले १५ रनको योगदान दिए ।
क्यानाडाका लागि उदय भगवानले ३ तथा साद बिन जफर र इश्वरजोत सोहीले २÷२ तथा शाहिद अमदजादी र हरेश ठाकेरले १÷१ विकेट लिए ।
