राजविराज । युनिक एजुकेशनलका संचालक जयप्रकाश ठाकुरले बिना आधार राजविराज नगरपालिकाका कार्यवाहक नगर प्रमुख इसरत परबिनसहितका व्यक्तिले आफ्नो र आफ्नो परिवारको बिषयमा भ्रम फैलाउँदै चरित्र हत्या गर्ने गरेको बताएका छन् ।
ठाकुरले शुक्रबार राजविराजस्थित नेपाल पत्रकार महासंघ, सप्तरीमा पत्रकार सम्मेलन गरी नगरपालिकाका जनप्रतिनिधी सबै जनताका प्रतिनिधी बन्नुपर्नेमा आफू र आफ्नो परिवारबिरुद्ध अनर्गल प्रचार गर्दै चरित्र हत्या नै गर्न खोजेको बताए ।
राजविराज नगरपालिका वडा नम्बर ३ हाल वडा नम्बर ४ को गाउँ ब्लक नम्बर को कित्ता नम्बर ५३५ को १५ कठ्ठा ९ धुर जग्गा श्रीमती संगीता ठाकुरको नाममा २०६७ सालमै रजिष्ट्रेशन भई हालसम्म मालपोत बुझाउँदै आएकोमा आफूहरुबिरुद्ध भ्रम फैलाउन खोजेको उनले बताए ।
जग्गाको चारैतिर लागेको पुरानो पक्की पर्खाल २०७३ सालमा भत्काएर नयाँ बनाउन लाग्दा नगरपालिकाबाट कामलाई यथास्थितिमा राखी आफ्नो सबुत प्रमाणसहित उपस्थित हुनको लागि पत्राचार गरेको र सबुत प्रमाण बुझाएपछि २०७३ असार २८ गते फुकुवा गर्दै काम गर्न दिएको स्मरण गराउँदै उनले अहिले आएर बिना आधारको बक्तव्य दिनु चरित्र हत्या गर्नेबाहेक केहि पनि नभएको बताए ।
ठाकुरले जग्गामा नयाँ भवन निर्माणका लागि नक्सा बनाएर पास गरिदिन दस्तुर रु २ लाख ११ हजार ४५७ र धरौटि रु १ लाख ४ हजार ४४९ बुझाउँदै २०७८ भदौ २१ गते निवेदन दिएपनि हालसम्म नक्सा पास नगरी भवन निर्माणको अनुमति नदिएको बताए । ‘भवन निर्माणका लागि निवेदन पेश गरेको सात दिनभित्र प्रमुख प्रशासकीय अधिकृतले अनुमति दिनुपर्ने व्यवस्था छ । तर निवेदन दर्ता गराएको २५ महिना बित्दा पनि नक्सा पास नगरी आर्थिक क्षति मात्र पुर्याएको छ’ उनले भने ।
अरुको उजुरी लिई आफ्नो कार्यालयको अभिलेख समेत नभिडाई नगरपालिकाले तीन दिनको म्याद काट्ने र सो समयमा नआए कार्वाही हुने चेतावनीसहितको पत्र काटेर मेरो श्रीमती र परिवारलाई मानसिक यातना दिएको उनको भनाई छ ।
‘उल्टै मेरो क्षति गराई राजनीतिक ओतप्रोत भएर मलाई बदनाम गर्ने कार्य नगरपालिकाले गरेको छ’ ठाकुरले भने, ‘राजविराज नगरपालिकाले पठाउने र लेख्ने हरेक पत्रमा संगीता कुमारी ठाकुरको नाममा कायम रहेको जग्गा उल्लेख गर्दै आउनु र तथापी पनि बिना कारण मानसिक तनाव दिनु न्यायोचित्त होइन् । नगरपालिका सबैको हो । र, रहनुपर्छ ।’
आफैं बोक्सी, आफैं धामी बन्ने प्रबृत्ति ठीक नभएको बताउँदै उनले कानुनी प्रकृयालाई टेकेर, आफ्नो अभिलेख हेरेर मात्र अभिव्यक्ति दिन र यस किसिमको चरित्र हत्या गर्ने काम बन्द गर्न अनुरोध गरे । ‘आगामी दिनमा यस किसिमको कार्य गरिए कानुनी उपचारमा जानेछौं’ ठाकुरले पत्रकार सम्मेलनमा भने ।
