राजविराज । सप्तरीको बलान बिहुल गाउँपालिका वडा नम्बर ४ स्थित जनता आधारभूत विद्यालयको अतिक्रमित जग्गा खाली गराउने सहमति भएको छ ।
विद्यालयको ६ कठ्ठा साढे १९ धुर जग्गा रहेकोमा झन्डै अढाई कठ्ठा जग्गा अतिक्रमण गरिएको छ । सोही अतिक्रमण गरिएको जग्गा खाली गराउने निर्णय भएको विद्यालय व्यवस्थापन समितिका अध्यक्ष अशोक यादवले जानकारी दिए ।
आइतबार गाउँपालिकाका अध्यक्ष खेमचन्द्र यादव, उपाध्यक्ष रेणु यादवसहितका जनप्रतिनिधि, अमिन, स्थानीय समाजसेवी, प्रहरीसहितको टोलीले अतिक्रमण गरिएको जग्गा भत्काउन चिन्ह लगाएको छ । व्यवस्थापन समितिका अध्यक्ष यादवले आएका प्राविधिकले जग्गाको नापी गरि चिन्ह लगाएको र एक साताभित्र खाली गर्न सूचना जारी गरिएको जानकारी दिए ।
लामो समयदेखि केहि व्यक्ति विद्यालयको जग्गा अतिक्रमण गरी घर बनाएर बसोबास गर्दै आएका छन् । घर बनाएर बसोबास गर्नेहरुले विद्यालयले नै आफुहरुको बाटो बन्द गरेको भन्दै केहि दिनअघि उच्च अदालत जनकपुर राजविराज इजलासमा मुद्दा दिएका थिए । तर अदालतले हकदाबी नपुगेको ठहर गरेको थियो ।
विद्यालय व्यवस्थापन समितिका अध्यक्ष यादवले अदालतले अतिक्रमण गरेकाहरूकाे जग्गा खाली गराउन पनि आदेश दिएको बताए ।
गाउँपालिका अध्यक्ष खेमचन्द्र यादवले यसअघि पनि ३५ दिने सूचना र वडा कार्यालयले पनि एक साताको सूचना निकालेपनी खाली नगरेको बताए ।
‘अब निर्णय भइसकेको छ, खाली नगरे हटाइनेछ’ उनले भने ।
