राजविराज । दुग्ध उत्पादक सहकारी संघ, सप्तरीले दूध बिक्री वापत पाउनुपर्ने रकम विगत ८ महिनादेखि नपाएको भन्दै दिलाइदिन माग गर्दै आन्दोलन घोषणा गरेको छ ।
दुग्ध किसानको सरकारी स्वामित्वमा रहेको दुग्ध विकास संस्थान अन्तर्गत विराटनगर दुग्ध वितरण आयोजनासहितका अन्य नीजि डेरी उद्योगीले विगत ८ महिनादेखि ८ करोडभन्दा बढीकोृ भुक्तानी नदिएको भन्दै यथाशिघ्र गराइदिन माग गर्दै आन्दोलनको घोषणा गरिएको हो ।
प्रमुख जिल्ला अधिकारी किरण थापालाई मंगलबार ज्ञापन पत्र भुक्तानी दिलाइदिनसहित ११ बुँदे माग अघि सारेको छ ।
माग पूरा गराउन १७ गते सांकेतिक रुपमा शान्तिपूर्ण तरिकाले दुध पोखेर बिरोध जनाउने निर्णय उनीहरुले गरेका छन् । त्यस दिन मध्यान्ह १२ देखि १ बजेसम्म पूर्व पश्चिम राजमार्ग अन्तर्गत महुलीमा दुध पोखेर एक घण्टा चक्काजाम गर्ने कार्यक्रम तय गरिएको संघका अध्यक्ष दिपेन्द्र कुमार आचार्यले जानकारी दिए ।
उनका अनुसार दुग्ध सहकारी संस्था लिमिटेड नेपालले आह्वान गरेको अन्य सबै आन्दोलनमा सहभागी हुने र फागुन २१ देखि माइतीघर मण्डलामा हुने धर्ना तथा बिरोध प्रदर्शन माग पूरा नभएसम्म जारी राख्ने निर्णय भएको छ ।
