राजविराज । सप्तरीका किसानले दूध बिक्री वापत पाउनुपर्ने रकम विगत ८ महिनादेखि नपाएको भन्दै माेही पिलाएर आन्दोलन गरेका छन् ।
दुग्ध उत्पादक सहकारी संघ, सप्तरीको अगुवाईका किसानले जिल्लाको अग्निसाइर कृष्णसवरण गाउँपालिकास्थित महुलीमा बसका यात्रुसहित उपस्थित भएका सबैलाई माेही पिलाएर आन्दोलन गरेका छन् । दुध पोखेर उनीहरुले केहि बेर पूर्व पश्चिम राजमार्ग अवरुद्ध गरेका छन् ।
मध्यान्ह १२ बजेदेखि दिउँसो १ बजेसम्म पुर्व पश्चिम राजमार्ग अन्तर्गत महुलीमा चक्काजाम गरे । त्यस क्रममा बसका यात्रु, आन्दोलनम जुटेका किसान, समाचार संकलन गर्न गएका पत्रकारसहितकालाई मोही पिलाइयो ।
यसअघि किसानले दूध पोखेर आन्दोलन गर्ने जनाएको थियो ।
दुग्ध किसानको सरकारी स्वामित्वमा रहेको दुग्ध विकास संस्थान अन्तर्गत विराटनगर दुग्ध वितरण आयोजनासहितका अन्य नीजि डेरी उद्योगीले विगत ८ महिनादेखि ८ करोडभन्दा बढीको भुक्तानी नदिएको भन्दै उनीहरु आन्दोलनमा उत्रेका हुन् ।
यसअघि दुग्ध उत्पादक संघले प्रमुख जिल्ला अधिकारी किरण थापालाई मंगलबार ज्ञापन पत्र बुझाउँदै भुक्तानी दिलाइदिन सहितका ११ बुँदे माग राखेको थियो ।
दुग्ध उत्पादक सहकारी संघले पछिल्लो साउनदेखि पुस मसान्तसम्म एक अर्ब ४३ करोड ९९ लाख २३ हजारको दुग्धजन्य पदार्थ आयात भएको देखिँदा सो पूर्ण बन्द गराई स्टकमा रहेका दुग्धजन्य पदार्थलाई अन्तर्राष्ट्रिय बजारमा अबिलम्ब बिक्री गर्ने व्यवस्था मिलाउन माग गरेको छ ।
दुग्ध किसानलाई सहुलियत कृषि कर्जामा एवं रोकिएको व्याज कृषि अनुदान कार्यक्रम उपलब्ध गराउन, प्रति लिटर दुधमा कम्तीमा रु १० सबै पालिकामा सबै किसानले पाउने गरी लागू गराउन, पशु आहारा, पशु औषधिसहित पशु पालनसँग सम्बन्धित वस्तुका मूल्य राज्यबाट अबिलम्ब नियन्त्रण गर्न ज्ञापन मार्फत् उनीहरुले माग गरेका छन् ।
